នាយករដ្ឋមន្ត្រី អះអាងថា បញ្ហាគ្រោះថ្នាក់ចរាចរណ៍ នៅតែជាបន្ទុកធ្ងន់ធ្ងរសម្រាប់រដ្ឋាភិបាល ដោយថា មនុស្សមួយចំនួននៅតែបើកបរមិនគោរពច្បាប់ និងថា ខ្លះទៀតបើកបរក្រោមឥទ្ធិពលនៃគ្រឿងស្រវឹង។
ក្នុងពិធីប្រារព្ធខួបកាកបាទក្រហមកម្ពុជា នៅរាជធានីភ្នំពេញ នាថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានថ្លែងសរសើរ ក្រុមយុវជនកាកបាទប្រហមកម្ពុជា ដែលក្រុមយុវជនទាំងនោះតែងតែចំណាយពេលឈរនៅតាមភ្លើងស្តុបនានា ក្នុងរាជធានីភ្នំពេញ ដើម្បីពន្យល់ដល់អ្នកបើកបរឲ្យគោរពច្បាប់ និងប្រកាសប្រាប់ពីផលប៉ះពាល់ដែលកើតចេញពីគ្រោះថ្នាក់ចរាចរណ៍នេះ។
លោកថា៖ «ខ្ញុំយល់ថា អ្នកបើកបរក្រោមឥទ្ធិពលនៃគ្រឿងស្រវឹង និងអ្នកបើកបរទាំងបំពានច្បាប់ គួរតែមានការខ្មាស់អៀនយុវជនកាកបាទក្រហមកម្ពុជា ដែលឈរនៅតាមដងផ្លូវ ហើយអប់រំចំពោះអ្នកដែលបើកបរខុសច្បាប់។ ឥឡូវនេះ ប្រទេសរបស់យើងកំពុងទទួលផលអាក្រក់អំពីគ្រោះថ្នាក់ចរាចរណ៍»។
លោក ហ៊ុន សែន អះអាងទៀតថា ការចំណាយពេលរបស់ក្រុមយុវជនកាកបាទក្រហមកម្ពុជា បានជួយកាត់បន្ថយបន្ទុករដ្ឋាភិបាល។
អ្នកស្រាវជ្រាវពីការអភិវឌ្ឍសង្គម លោក ប៉ា ចន្ទរឿន លើកឡើងថា ដើមចមនៃបញ្ហាគ្រោះថ្នាក់ចរាចរណ៍ អាចមកពីការអនុវត្តច្បាប់មិនស្មើភាព និងអ្នកបើកបរខ្លះមិនយល់ពីច្បាប់។
លោកថា៖ «ប៉ូលិសចរាចរ មានប៉ូលិសល្អ មានប៉ូលិសអាក្រក់ ប៉ុន្តែ ជាទូទៅ ពួកគាត់ចាប់ផាកពិន័យតែពលរដ្ឋស៊ីវិលធម្មតា អ្នកបើកម៉ូតូ ឬអ្នកបើកឡានសេរីទាបៗ ដោយឡែកអ្នកបើកឡានសេរីខ្ពស់ៗ ឬអ្នកមានស្លាក ខ.ម. ឬកាន់អំណាចអី មិនគោរពច្បាប់ ពួកគាត់បិទភ្នែកឲ្យទៅ។ អាហ្នឹង វាបង្ហាញពីភាពអយុត្តិធម៌មួយនៅក្នុងសង្គម»។
នាយករងវិទ្យាស្ថានសុវត្ថិភាពចរាចរណ៍ លោក គង់ រតនៈ លើកឡើងថា ការដែលនាយករដ្ឋមន្ត្រីស្នើឲ្យកែច្បាប់មិនតម្រូវឲ្យអ្នកបើកបរម៉ូតូកម្លាំង ១២៥CC ចុះក្រោមមិនចាំបាច់ទៅរៀនបើកបរ លោកថា នោះក៏ជាជ្រុងមួយជំរុញឲ្យមានគ្រោះថ្នាក់ចរាចរណ៍ដែរ ដោយថា អ្នកទាំងនោះមិនយល់ពីច្បាប់ចរាចរណ៍។
លោក គង់ រតនៈ លើកឡើងថា ដើម្បីកាត់បន្ថយគ្រោះថ្នាក់ចរាចរណ៍ រដ្ឋាភិបាលត្រូវជំរុញមន្ត្រីជំនាញ ឲ្យបង្កើនការផ្សព្វផ្សាយពីច្បាប់ចរាចរណ៍ឲ្យពលរដ្ឋយល់ដឹង ក្រើនរំឭកអ្នកប្រើប្រាស់ផ្លូវ ឲ្យចេះបារម្ភពីសុវត្ថិភាពផ្ទាល់ខ្លួន និងងជីវិតអ្នកដទៃ។
របាយការណ៍របស់នគរបាលជាតិ បានបង្ហាញថា មនុស្សដល់ទៅ ១៧៨០នាក់ បានស្លាប់ ហើយមនុស្សដល់ទៅ ៥៥៣៩នាក់ទៀត បានរងរបួស នៅក្នុងគ្រោះថ្នាក់ចរាចរណ៍កាលពីឆ្នាំ២០១៧កន្លងមកនេះ។ របាយការណ៍ដដែលនេះ បានបន្ទោសទៅលើការបើកបរហួសល្បឿនកំណត់ និងបើកបរក្រោមឥទ្ធិពលនៃគ្រឿងស្រវឹង គឺជាដើមចមនៃគ្រោះថ្នាក់ចរាចរណ៍៕