ប្រជាសហគមន៍មានជម្លោះដីធ្លីមកពីខេត្តកោះកុង ហើយស្នាក់នៅវត្តសាមគ្គីរង្ស៊ី២ខែមកនេះ បានថ្លែងថា ពួកគាត់កំពុងរងទុក្ខលំបាកខ្វះខាតអាហារ ហើយថាបើនៅតែមិនមានដំណោះស្រាយទៀតនោះ ពួកគាត់នឹងធ្វើដំណើរទៅផ្ទះលោកនាយករដ្ឋមន្ត្រី ហ៊ុន សែន នៅសប្តាហ៍ក្រោយ។
នៅក្នុងសន្និសីទសារព័ត៌មាននៅព្រឹកនេះ អ្នកស្រី ផាវ ញើង ពលរដ្ឋដែលមានជម្លោះដីធ្លីថ្លែងទាំងទឹកភ្នែកថា ពួកគាត់ជួបការលំបាកខ្លាំង ដោយសារក្រុមហ៊ុន យកដីពួកគាត់នៅស្រុកស្រែអំបិល ខេត្តកោះកុង ប្រមាណ១០ឆ្នាំមកនេះ ធ្វើឲ្យពួកគាត់បាត់បង់មុខរបរ ចំណែកការស្វែងរកដំណោះស្រាយក៏នៅតែអូសបន្លាយមិនមានចម្លើយ។
អ្នកស្រីផាវ ញើង ក៏បានលើកឡើងថា ពួកគាត់ជួបការលំបាកខ្លាំង ខណៈអ្នកខ្លះខ្ចីលុយគេមកតវ៉ា ដើម្បីរកដំណោះស្រាយដីធ្លី ប៉ុន្តែអាជ្ញាធរបែរជាចោទពួកគាត់ថា ធ្វើសកម្មភាពដោយសារមានគណបក្សផ្សេងនៅពីក្រោយទៅវិញ។
ក្រុមពលរដ្ឋអះអាងថា ពួកគេជិត២០០គ្រួសារនៅស្រុកស្រែអំបិលនិងស្រុកបុទមសាគរខេត្តកោះកុងបានបាត់ បង់ដីទំហំ៨៤១ហិកតាតាំងពីឆ្នាំ២០០៦និងខ្លះ២០០៩ ដែលអ្នកតវ៉ាចោទថាដីទាំងនោះត្រូវបានក្រុមហ៊ុនចំនួនពីរនៅខេត្តនោះរំលោភយក គឺមានក្រុមហ៊ុនរបស់ លោក ហេង ហ៊ុយ៕
