ប្រធានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងថា រដ្ឋាភិបាលគ្រោងនឹងកសាងមជ្ឈមណ្ឌលអប់រំនិង ព្យាបាលអ្នកញៀនថ្នាំ នៅក្នុងខេត្តព្រះសីហនុ នៅពាក់កណ្តាលឆ្នាំ២០១៨ ដើម្បីដោះស្រាយអ្នកដែលរងគ្រោះដោយសារថ្នាំញៀនរយៈពេលយូរ។
អាជ្ញាធរជាតិប្រយុទ្ធប្រឆាំងគ្រឿងញៀននៅព្រឹកថ្ងៃទី៧ ខែមីនា ឆ្នាំ២០១៧ បានប្រជុំផ្សព្វផ្សាយផែនការសកម្មភាពផ្សព្វផ្សាយអប់រំពីបញ្ហាគ្រឿងញៀននិងការបណ្តុះបណ្តាលជនបង្គោលនៃគណៈកម្មការទទួលបន្ទុកផ្សព្វផ្សាយអប់រំ។ ក្នុងឱកាសនោះ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងថា ការបង្ក្រាបគ្រឿងញៀនចាប់បានអ្នកពាក់ព័ន្ធច្រើន ប៉ុន្តែលោកថាមិនទាន់ស៊ីជម្រៅនោះទេ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
លោក កែ គឹមយ៉ាន បានមានប្រសាសន៍លើកឡើងថា រាជរដ្ឋាភិបាលគ្រោងបង្កើតមណ្ឌលអប់រំព្យាបាលអ្នក ញៀនគ្រឿងញៀនក្រោមការរៀបចំរបស់ក្រសួងសង្គមកិច្ច ដែលមានគម្រោងសាងសង់នៅពាក់កណ្ដាលឆ្នាំ ក្រោយនៅខេត្តព្រះសីហនុ ដើម្បីដោះស្រាយបញ្ហាអ្នកដែល រងគ្រោះធ្ងន់ៗត្រូវការព្យាលបាលរយៈពេលយូរ មិនត្រឹមតែព្យាបាលនោះទេគឺនឹងផ្ដល់ជំនាញក្រោយពេលព្យាបាលជាហើយគឺនឹងមានលទ្ធភាពធ្វើការងារ ចិញ្ចឹមជីវិតផងដែរ៕
