អ្នកស្រី អ៊ុងសាន ស៊ូជី បានទទួលរង្វាន់កិត្តិយសផ្នែកសេរីភាពទីក្រុងឡុងដ៍ នៅថ្ងៃនេះ ខណៈដែលបាតុករមួយក្រុមតូច បានប្រមូលផ្ដុំគ្នាតវ៉ាចំពោះការរំលោភសិទ្ធិមនុស្សទៅលើជនជាតិភាគតិចមូស្លីមរ៉ូហ៊ីងយ៉ា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
មេដឹកនាំភូមារូបនេះ បានទទួលរង្វាន់នេះនៅឯសាលាក្រុង Guildhall បន្ទាប់ពីបានជួបជាមួយម្ចាស់ក្សត្រីយ៍ អេលីហ្សាប៊ែតទី ២ និងរាជទាយាទ ព្រះអង្គម្ចាស់ ឆាលស៍ កាលពីថ្ងៃសុក្រសប្ដាហ៍មុន។
រង្វាន់នេះ បានបង្ហាញនូវការទទួលការតស៊ូដោយអហិង្សារបស់អ្នកស្រីអស់រយៈពេលជាច្រើនឆ្នាំដើម្បីលទ្ធិប្រជាធិបតេយ្យ និងការលះបង់របស់អ្នកស្រីចំពោះការបង្កើតសង្គមមួយ ដែលមនុស្សអាចរស់នៅក្នុងសន្តិភាព សន្តិសុខ និងសេរីភាព។
ជ័យលាភីពានរង្វាន់ណូបែលសន្តិភាព អ្នកស្រី ស៊ូជី កំពុងស្ថិតក្នុងដំណើរទស្សនកិច្ចនៅតំបន់អឺរ៉ុប ជាទីដែលអ្នកស្រីបានធ្វើដំណើរទៅកាន់ប្រទេសប៊ែលហ្ស៊ិក អ៊ីតាលី និងបុរីវ៉ាទីកង់ រួចហើយ។
ខណៈដែលអ្នកស្រី ស៊ូជី ទទួលរង្វាន់នេះ ក្រុមបាតុករប្រហែល ៤០នាក់ បានប្រមូលផ្ដុំគ្នាតវ៉ានៅខាងក្រៅអគារ Guidlhall ដោយស្រែកខ្លាំងថា “អ្នកស្រី ស៊ូជី ជាមនុស្សកុហក ជនជាតិរ៉ូហ៊ីងយ៉ាកំពុងស្លាប់”៕
