មេដឹកនាំបក្សកាន់អំណាច និងជានាយករដ្ឋមន្ត្រីផងនោះ បានផ្ញើសារបែបគំរាម មុនយុទ្ធនាការឃោសនាបោះឆ្នោតមកដល់ថា បើចង់រក្សាសន្តិភាព បោះឆ្នោតឲ្យគណបក្សប្រជាជនម្ពុជា។
ការថ្លែងបែបនេះ របស់លោកនាយករដ្ឋមន្ត្រី ហ៊ុន សែន បានធ្វើឡើងក្នុងពិធីចុះជួបកម្មករនៅក្រុងបាវិត ខេត្តស្វាយរៀល នាថ្ងៃពុធនេះ។
លោក ហ៊ុន សែន ក្រៅពីថ្លែង រំឭកស្តីពីប្រវត្តិតស៊ូ របស់លោក រំដោះប្រទេសចេញពីរបបប៉ុល ពត លោកក៏បានថ្លែងបែបវាយប្រហារថា ក្រុមប្រឆាំងក៏បានព្យាយាមបំផ្លាញសន្តិភាព ដែលកម្ពុជាបានមក ដោយកម្រនេះដែរ។
មេដឹកនាំរូបនេះ បញ្ជាក់ថាតាមរយៈសន្តិភាពនេះជំរុញឲ្យពលរដ្ឋមានជីវភាពប្រសើរជាងមុន អាចកែលំអរផ្ទះ និងខ្លះទៀតសង់ផ្ទះថ្មីបាន ។លោកថា ចំណែកកម្មករវិញ មានប្រាក់ចំណូលច្រើនជាងមុន តាមរយៈដំឡើងប្រាក់ឈ្នួល ពី១៥៣ដល់ ១៧០ដុល្លារក្នុងមួយខែ ។
លោក ហ៊ុន សែន អះអាងទៀតថា ដើម្បីរក្សាបានប្រាក់ចំណូល មុខរបរ ត្រូវចូលរួមរក្សាសន្តិភាព គឺ បោះឆ្នោតឲ្យគណបក្សប្រជាជនកម្ពុជា។
លោកថា៖«ការរក្សាសន្តិភាពនេះវាងាយធ្វើទៅបាន និងធានាថាធ្វើបានប្រសិនបើក្មួយៗនិងក្រុមគ្រួសារបោះឆ្នោតឲ្យគណបក្សប្រជាជនកម្ពុជា»។
យ៉ាងនេះក្តី បញ្ហានយោបាយនៅកម្ពុជា ត្រូវបានសហគមន៍អន្តរជាតិ កំពុងដាក់សម្ពាធឲ្យរដ្ឋាភិបាលស្តារប្រជាធិបតេយ្យឡើងវិញ ដោយជំរុញឲ្យដោះលែង លោក កឹម សុខា និងបើកផ្លូវឲ្យបក្សប្រឆាំង ដែលបានរំលាយទៅហើយនោះ បានចូលរួមប្រកួតការបោះឆ្នោតដោយសេរី និងយុត្តិធម៌ឡើងវិញ ដោយថា ដើម្បីជាជម្រើសរបស់ម្ចាស់ឆ្នោត។
