ជម្លោះដីធ្លីមួយចំនួននៅខេត្តកោះកុងត្រូវបានដោះស្រាយ ខណៈជិតបោះឆ្នោត

អ្នកមានជម្លោះដីធ្លីមកពីខេត្តកោះកុង

អ្នកមានជម្លោះដីធ្លី នៅឃុំជីខក្រោម ស្រុកស្រែអំបិល ខេត្តកោះកុង អះអាងថា ក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ហាដីធ្លីឲ្យពួកគាត់មួយចំនួន ខណៈមួយចំនួនទៀត កំពុងបន្តដោះស្រាយ។

អ្នកមានជម្លោះដីធ្លី នៅឃុំជីខក្រោម ស្រុកស្រែអំបិល ខេត្តកោះកុង អះអាងថា ក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ហាដីធ្លីឲ្យពួកគាត់មួយចំនួន ខណៈមួយចំនួនទៀត កំពុងបន្តដោះស្រាយ។

កន្លងមក អ្នកមានជម្លោះដីធ្លី នៅខេត្តកោះកុងជាង១០០គ្រួសារ ធ្លាប់ដាក់ញត្តិទៅក្រសួង រៀបចំដែនដី នគរូបនីយកម្ម និងសំណង់ និងស្ថាប័នពាក់ព័ន្ធ ដើម្បីឲ្យជួយដោះស្រាយបញ្ហាដីធ្លី ដែលពលរដ្ឋថាពាក់ព័ន្ធ ជាមួយក្រុមហ៊ុនពីរគឺ ក្រុមហ៊ុនកោះកុងស៊ូហ្គឺ និងក្រុមហ៊ុនកោះ​កុងផ្លែនថេសិន របស់លោក ហេង ហ៊ុយ។

តំណាងពលរដ្ឋអ្នកស្រី ផាវ ញើង ប្រាប់វីអូឌីនៅថ្ងៃចន្ទទី០៩ខែតុលានេះថា កាលពីម្សិលមិញ ក្រសួងរៀបចំដែនដី និងក្រុមហ៊ុន ហេង ហ៊ុយ បានដោះស្រាយបញ្ចប់ញ្ហាដីធ្លីឲ្យពួកគាត់ ដោយបានប្រគល់ដីលំនៅឋានទំហំជាង៥០ហិចតាឲ្យពួកគាត់ទាំង១៧គ្រួសារវិញ។ ប៉ុន្តែសម្រាប់ពលរដ្ឋ១៧៥គ្រួសារ ដែលមានជម្លោះដីធ្លីជាមួយក្រុមហ៊ុនស្ករអំពៅ អ្នកស្រីថា នៅមិនទាន់ដោះស្រាយឡើយនៅឡើយ។ អ្នកស្រីស្នើទៅរដ្ឋាភិបាល និងស្ថាប័នពាក់ព័ន្ធ ពន្លឿនការដោះស្រាយ ដើម្បីបញ្ចប់បញ្ហាវិវាទដីធ្លី ដែលបានអូសបន្លាយជិត១០ឆ្នាំនេះ។

អ្នកស្រី៖ «យើងសង្ឃឹមថា ឯកឧត្ដម ជា សុផារ៉ា និងសម្ដេច មិនបោះបង់នៅអ្វីដែលពួកខ្ញុំទាមទារកន្លងទៅ ក្នុងករណីដីស្ករអំពៅរបស់ក្រុមកោះកុងស៊ូហ្គឺ ដែលកន្លងមក គឺជាក្រុមហ៊ុន លោក លី យ៉ុងផាត់ នោះ។ ចឹងយើង រំពឹងថា ពួកគាត់នឹងផ្ដល់អាទិភាពក្នុងការដោះស្រាយឲ្យវិវាទដីនេះ បញ្ចប់ក្នុងរយៈពេលខ្លីខាងមុខនេះ ដល់ពួកខ្ញុំ​ ១៧៥គ្រួសារទៀត»។

ទោះជាយ៉ាងណា មន្ត្រីសម្រួលសម្រួល នៃក្រុមហ៊ុនកំពង់ស្ពឺស៊ូហ្គឺ លោក ស៊ិន សត្ថា លើកឡើងថា ក្រុមហ៊ុនកោះកុងស៊ូហ្គឺ លែងជារបស់លោក លី យ៉ុងផាត់ ទៀតហើយ។

លោកមានប្រសាសន៍ថា៖ «ជាទូទៅ យើងច្រឡំយូរហើយ និយាយជារួម ពាក់ព័ន្ធបញ្ហានៅកោះកុង លែងពាក់ព័ន្ធនឹងគាត់ទៀតហើយ លោកឧកញ៉ា (លោក លី យ៉ុងផាត់) នៅតែកំពង់ស្ពឺមួយទេ»។

កាលពីថ្ងៃទី៣០ ខែសីហា ឆ្នាំ២០១៧ រដ្ឋាភិបាល បានបញ្ជាទៅមន្រ្តីក្រោមឱវាទឲ្យពន្លឿនដោះស្រាយបញ្ចប់បញ្ហាវិវាទដីធ្លី យ៉ាងតិចចំនួនបីខេត្ត ដែលពាក់ព័ន្ធជាមួយក្រុមហ៊ុនស្ករអំពៅ នៅក្នុងខេត្តកោះកុង កំពង់ស្ពឺ និងខេត្តព្រះវិហារ។  ការពន្លឿការដោះស្រាយនេះ ធ្វើឡើងស្របពេល កម្ពុជានឹងរៀបចំការបោះឆ្នោតជាតិនៅឆ្នាំ២០១៨។

ចំណែក នាយកលេខាធិកាដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ ធ្លាប់លើកឡើងថា យន្តការដោះស្រាយបញ្ចប់វិវាទដីធ្លីរបស់រដ្ឋាភិបាលពេលនេះ ជាផ្នែកមួយជួយស្តារមុខមាត់ គណបក្សកាន់អំណាច ខណៈការបោះឆ្នោតជាតិជិតមកដល់។

លោកបន្ថែមថា៖ «គណបក្សប្រជាជន គាត់មិនអាចមើលងាយរឿងតូចតាចនេះបានទេ។ បើគាត់ប្រមូលផ្តុំ វាអាចធ្វើឲ្យអាធំបាស់ជើង ឬក៏រាប! អញ្ចឹងត្រូវតែយកចិត្តទុកដាក់តូចៗហ្នឹង វាងាយដោះស្រាយផង វាមិនមានអីពិបាកក្នុងការដោះស្រាយទេ អញ្ចឹងខ្ញុំគិតថា គណបក្សកាន់អំណាច គាត់មិនឆោតល្ងង់ទេ គាត់ត្រូវតែដោះស្រាយឲ្យទាន់ពេលវេលា ដើម្បីកុំឲ្យប៉ះពាល់ទៅដល់សំលេងឆ្នោតរបស់គណបក្សកាន់អំណាចនៅការបោះឆ្នោតនៅឆ្នាំ២០១៨ ខាងមុខនេះ»។

គួររលឹកថា ពលរដ្ឋខេត្តកោះកុង ជិត២០០គ្រួសារ នៅស្រុកស្រែអំបិល និងស្រុកបទុមសាគរ អះអាងថា ពួកគេ មានជម្លោះដីធ្លីជាមួយក្រុមហ៊ុនកោះកុងស៊ូហ្គឺ និងក្រុមហ៊ុនកោះកុងផ្លែនថេសិន ដោយថា បានបាត់បង់ដីទំហំ ៨៤១ហិចតា តាំងពីឆ្នាំ២០០៦ និងខ្លះតាំងពីឆ្នាំ២០០៩៕

CCIM/VOD

រក្សាសិទ្វិគ្រប់យ៉ាង។ គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។