សមាជិកក្រុមប្រឹក្សាខេត្តបន្ទាយមានជ័យស្នើឡើងឲ្យមន្ត្រីពាក់ព័ន្ធរួមទាំងអភិបាលខេត្តនិងមន្ត្រីនៅមន្ទីរពាណិជ្ជកម្មជួយអន្តរាគមន៍រកទីផ្សារ ដើម្បីលក់ដំឡូងមីរបស់ប្រជាកសិករដែលដាំបានលក់បានតម្លៃថោកឬមិនមានទីផ្សារ។
នៅក្នុងកិច្ចប្រជុំក្រុមប្រឹក្សាខេត្តកាលពីព្រឹកថ្ងៃទី៩ ខែមីនាម្សិលមិញ លោក អ៊ី ឡុង សមាជិកក្រុមប្រឹក្សាភិបាលមានប្រសាសន៍ថា ខេត្តនេះប្រជាកសិករភាគច្រើនធ្វើស្រែចំការ ប៉ុន្តែលោកថានៅឆ្នាំ២០១៦និង២០១៧ តម្លៃកសិផល ពិសេសដំឡូងលក់បានតម្លៃថោកពេក។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
លោកអំពាវនាវឲ្យមន្ត្រីពាក់ព័ន្ធអន្តរាគមន៍រកដំណោះស្រាយ ដោយលោកថា បើមិនបានថ្លៃខ្ពស់ណាស់ឲ្យតែបានដូចប៉ុន្មានឆ្នាំមុន ព្រោះលោកថា តម្លៃទាបដូចបច្ចុប្បន្នអាចធ្វើឲ្យកសិករខាតបង់ច្រើន ហើយប៉ះពាល់ដល់ជីវភាពពួកគាត់កាន់តែខ្លាំង៕