សេតវិមានអាមេរិក នៅថ្ងៃនេះ បានរិះគន់ចំពោះការអំពាវនាវឲ្យមានរដ្ឋអាជ្ញាពិសេសមួយសម្រាប់ស៊ើបអង្កេតទៅលើការចោទថា យុទ្ធនាការឃោសនាបោះឆ្នោតរបស់លោក ដូណាល់ ត្រាំ បានទទួលការជួយជ្រោមជ្រែងជាសម្ងាត់ពីប្រទេសរុស្ស៊ី បន្ទាប់ពីប្រធានាធិបតីអាមេរិកបានបណ្ដេញនាយកការិយាល័យស៊ើបអង្កេតសហព័ន្ធ FBI លោក Jamese Comey។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ការបណ្ដេញលោក James Comey ដោយលោក ត្រាំ បានជំរុញឲ្យមានកំសួលនយោបាយនៅទីក្រុងវ៉ាស៊ីងតោន និងបានជំរុញឲ្យតំណែងប្រធានាធិបតីដ៏ក្មេងខ្ចីនេះធ្លាក់ទៅក្នុងស្ថានភាពមិនប្រាកដប្រជា។
ក្រុមគណបក្សប្រជាធិបតេយ្យ បានលើកឡើងថា កិច្ចការរបស់ FBI នៅពេលនេះ នឹងស្ថិតក្នុងស្ថានភាពរញ៉េរញ៉ៃ ហើយគណបក្សនេះ បានទាមទារឲ្យមានរដ្ឋអាជ្ញាពិសេសមួយ ដែលមានលក្ខណៈស្រដៀងគ្នាទៅនឹងការតែងតាំងរដ្ឋអាជ្ញាពិសេសដូចនៅក្នុងរដ្ឋបាលរបស់លោក Richard Nixon ឬក៏រឿងអាស្រូវអតីតប្រធានាធិបតី ប៊ីល គ្លីនតុន។
ទោះជាយ៉ាងណា លោក ត្រាំ បានការពារជំហររបស់លោកក្នុងការបណ្ដេញមេ FBI លោក James Comey និងបានច្រានចោលសំណើរបស់បក្សប្រជាធិបតេយ្យ ឲ្យមានការស៊ើបអង្កេតទៅលើការចោទប្រកាន់ខាងលើ៕
