កម្ពុជានិងឥណ្ឌូនេស៊ីពង្រឹងកិច្ចសហការលើវិស័យយោធាដោយជំរុញការចុះអនុស្សរណៈ នៃការយោគយល់គ្នា (MoU) ឲ្យបានឆាប់។ នេះបើតាមការបញ្ជាក់របស់ក្រសួងការពារជាតិកម្ពុជា។
បើតាមគេហទំព័រក្រសួងការពារជាតិ ក្នុងជំនួបរវាងលោក ហ៊ុន សែន និងរដ្ឋមន្ត្រីក្រសួងការពារជាតិឥណ្ឌូនេស៊ី លោក រីយ៉ាមីហ្សាដ រីយ៉ាគូឌូ (Ryamizard Ryacudu) ក្នុងដំណើរទស្សនៈកិច្ចមកកម្ពុជានៅសប្តាហ៍នេះគឺភាគីទាំងពីរចង់ឃើញទំនាក់ទំនងទ្វេភាគីលើវិស័យការពារជាតិត្រូវបានពង្រឹងបន្ថែម ដោយឥណ្ឌូនេស៊ីចង់ផ្តល់សម្ភារៈយោធាមួយចំនួនដល់កម្ពុជា និងជំរុញកិច្ចសហប្រតិបត្តិការទៅលើវិស័យលំហសមុទ្រផងដែរ។
ក្រសួងបានសរសេរទៀតថាកន្លងមកប្រទេសឥណ្ឌូនេស៊ីបានផ្តល់ការហ្វឹកហ្វឺននិងបណ្តុះបណ្តាលដល់កងទ័ពពិសេសរបស់កម្ពុជានិងជាពិសេសកងអង្គរក្សរបស់នាយករដ្ឋមន្ត្រីលោក ហ៊ុន សែន។
ជាមួយគ្នានោះដែរនៅតាមហ្វេសប៊ុករបស់នាយករដ្ឋមន្ត្រី ហ៊ុន សែន បានបញ្ជាក់ដែរថានៅក្នុងជំនួបពិភាក្សានេះ លោក រីយ៉ាមីហ្សាដ រីយ៉ាគូឌូ (Ryamizard Ryacudu) បានបញ្ជាក់ផងដែរអំពីចំណុចសំខាន់៣នៃកិច្ចសហការដែលត្រូវឥណ្ឌូនេស៊ីត្រូវធ្វើជាមួយកម្ពុជាគឺ ពង្រឹងនិងជំរុញការចុះ MOU ឲ្យបានឆាប់ ការទប់ស្កាត់ ISIS និង ការត្រួតពិនិត្យដែនសមុទ្រ៕
