គណបក្សថ្មីមួយទៀតប្រកាសថាមិនចូលរួមបោះឆ្នោតខាងមុខនោះទេ ហើយជំរុញឲ្យមានការដោះស្រាយវិបត្តិនយោបាយរវាងភាគីពាក់ព័ន្ធ ឈានដល់ការបោះឆ្នោតដោយសេរី ត្រឹមត្រូវ និងយុត្តិធម៌អាចទទួលយកបាន។
គណបក្សជាតិនិយមបានចេញសេចក្ដីថ្លែងការណ៍មួយចុះថ្ងៃទី ១១ ខែ ឧសភាថា បក្សរបស់ខ្លួនធ្លាប់ចូលរួមបោះឆ្នោតអាណត្តិអាមុនៗ ហើយក៏ទទួលបានការគាំទ្រពីពលរដ្ឋដែរ ប៉ុន្តែក្នុងការបោះឆ្នោតនៅខែកក្ដដាខាងមុខបក្សជាតិនិយមមិនចូលរួមនោះទេ។
ក្នុងសេចក្ដីថ្លែងការណ៍ដដែលនោះបក្សជាតិនិយមបានទាមទារឲ្យមានការពិនិត្យច្បាប់ និង លិខិតបទដ្ឋានគតិយុត្តិ ដែលជាឧបករណ៍បម្រើការបោះឆ្នោត តាមគោលការណ៍ប្រជាធិបតេយ្យ សេរីពហុបក្ស ធានាឲ្យមានភាពស្មើគ្នាចំពោះមុខច្បាប់។
ជាមួយគ្នានោះបក្សជាតិនិយមក៏ជំរុញទាមទារឲ្យមានការដោះស្រាយវិបត្តិនយោបាយរវាងភាគីពាក់ព័ន្ធ សំដៅឲ្យមានការបោះឆ្នោតប្រកបដោយសេរី ត្រឹមត្រូវ យុត្តិធម៌ និងអាចជឿទុកចិត្តបាន ដែលឆ្លុះបញ្ជាំងពីឆន្ទៈប្រជាពលរដ្ឋពិតប្រាកដ។
កន្លងមកមានបក្សចំនួន ៤ ហើយដែលប្រកាសមិនចូលរួមការបោះឆ្នោតខាងមុខ ដូចជាបក្សភ្លើងទៀន បក្សសិទ្ធិមនុស្ស បក្សអំណាចខ្មែរ និង គណបក្សមហាសាមគ្គីជាតិខ្មែរ៕