តម្លៃប្រេងឥន្ធនៈ បានហក់ឡើងថ្លៃខ្ពស់ជាបន្តបន្ទាប់ នៅរយៈពេល៨ខែចុងក្រោយនេះ នាំឲ្យពលរដ្ឋមួយចំនួនត្អូញត្អែរថា ប៉ះពាល់ជីវភាពរបស់ពួកគាត់។
នៅតាមស្ថានីយ៍ប្រេងឥន្ធនៈមួយចំនួនក្នុងរាជធានីភ្នំពេញ នាថ្ងៃទី១៣ ខែកុម្ភៈ ឆ្នាំ២០១៨នេះ តម្លៃប្រេងសំាងស៊ុបពែក្នុងមួយលីត្រ ៤២៥០រៀល សំាងធម្មតាតម្លៃ៣៩៥០ និងប្រេងម៉ាសូតតម្លៃ ៣៧៥០រៀល ក្នុង១លីត្រ ដោយតម្លៃនេះ បានកើនឡើងពី ៣០០ ទៅ ៦០០រៀល បើធៀបនឹងអំឡុងពេល៨ខែមុន។ កាលពីថ្ងៃទី១២ខែមិថុនាឆ្នាំ២០១៧ ប្រេងសាំងស៊ុបពែ១លីត្រ៣៦៥០រៀល និងសាំងធម្មតា៣៦០០រៀល និង ម៉ាស៊ូត៣២៥០រៀល
អាជីវករនៅម្តុំវិទ្យាល័យសន្ធរមុខ លោក សន្ថា វុធ បានត្អូញត្អែរពីការឡើងថ្លៃប្រេងសាំងឡើងថ្លៃកាន់តែខ្ពស់ ដោយថា ធ្វើឲ្យប្រាក់ចំណេញរបស់លោកកាន់តែរួមតូច និងធ្វើឲ្យប៉ះពាល់ដល់ជីវភាពគ្រួសារ។
លោកបន្ថែមថា៖ «ប៉ះពាល់ច្រើនដែរ…ទីផ្សារក៏វាថ្លៃ ទំនិញ ទិញហូប យើងប៉ះពាល់ដែលរកលុយវាថយមកកាត់ទៅសាំងវាថ្លៃពេក»។
អ្នកប្រកបរបររត់រ៉ឺម៉កកង់បីនៅម្តុំផ្សារថ្មី លោក ឈួន បាន បានរៀបរាប់ថា ឥលូវនេះ ភ្ញៀវដែលជិះរ៉ឺម៉កកង់បីរបស់លោក ក៏មានចំនួនតិចព្រោះមានអ្នកប្រកបមុខរបរនេះច្រើន ហើយសាំងក៏កាន់តែឡើងថ្លៃទៀតនោះ បានធ្វើឲ្យលោករកប្រាក់ចំណេញបានកាន់តែតិច ដោយសារចំណាយលើសាំងអស់ច្រើន។
លោកឈួន បាន អំពាវនាវទៅរដ្ឋាភិបាលឲ្យសម្រួលតម្លៃប្រេងសាំងចុះត្រឹម៣០០០រៀលក្នុងមួយលីត្រ ដោយថា បញ្ហាសាំងឡើងថ្លៃនេះ មិនមែនប៉ះពាល់តែលោកអ្នករត់រ៉ឺម៉កកង់បីនោះទេ ប៉ុន្តែ លោកថា វាប៉ះពាល់ដល់ពលរដ្ឋខ្មែរទាំងមូល។
លោកថា៖ «រដ្ឋាភិបាលស្រែកចុះ ចុះបានបន្តិច ឡើងសឹមៗ ឥឡូវជិត៤០០០រៀលវិញ ខ្ញុំមើលទៅវាអត់ហ្នឹង ស្រែកតែអ្នកលក់ ឡើងម៉េចឡើងទៅស្រែកតែចិត្ត រដ្ឋាភិបាលស្រែកចេះតែស្រែក តែបានតែមួយភ្លែត តម្លៃបើនៅត្រឹម៣០០០រៀលក្នុងមួយលីត្របាន កុំថាឲ្យថោកពេក ក្រែងគេអត់ចំនេញ ត្រឹម៣០០០រៀលទៅ ឲ្យតែវាហ្នឹង»។
VOD មិនអាចសុំការបំភ្លឺពីអ្នកនាំពាក្យក្រសួងពាណិជ្ជកម្ម លោក សៀង ថៃ បានទេ នៅថ្ងៃនេះ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA លោក វន់ ពៅ លើកឡើងថា តម្លៃសាំងឡើងថ្លៃស្របពេលដែលស្ថានការណ៍នយោបាយកម្ពុជាកំពុងឡើងកំដៅ ធ្វើឲ្យឈ្នួញមានឱកាសកេងចំណេញតាមអំពើចិត្ត។ ករណីនេះលោកថា នាំឲ្យប៉ះពាល់ដល់សេដ្ឋកិច្ចទាំងមូល ជាពិសេសប៉ះដល់អ្នករត់តាក់ស៊ី រឺម៉កកង់បី និងប្រជាពលរដ្ឋធ្ងន់ធ្ងរ ខណៈទំនិញផ្សេងៗក៏ចាប់ផ្តើមឡើងថ្លៃផងដែរ។
លោក វន់ ពៅ មានការងឿងឆ្ងល់ថា ការបង់ពន្ធនាំចូលប្រេងឥន្ធនៈហាក់មិនមានការកើនឡើងទេ ប៉ុន្តែសាំងលក់ឡើងថ្លៃជាបន្តបន្ទាប់ ករណីនេះ លោកជំរុញទៅរដ្ឋាភិបាលដាក់វិធានការជាក់លាក់ លើការត្រួតពិនិត្យការនាំចូលប្រេងឥន្ធនៈនេះឡើយវិញ ទើបទទួលបានការសាទរពីប្រជាពលរដ្ឋ។
លោកយល់ឃើញថា៖«ដើមឆ្នាំ២០១៧រដ្ឋាភិបាលក៏មានដំណោះស្រាយម្តងមកដែរ ដែលមានដាក់កំរិតទៅឲ្យអ្នកដល់ប្រេងសាំងរាយ មិនឲ្យលើសពី៤០០០រៀល ខ្ញុំគិតថាក្រសួងសេដ្ឋកិច្ច ហិរញ្ញវត្ថុ ក្រសួងពាណិជ្ជកម្ម ហើយស្ថាប័នដែលពាក់ព័ន្ធអាចមានវិធានការជាក់លាក់ណាមួយ ដើម្បីបញ្ចុះតម្លៃប្រេងឥន្ធនៈនេះ ហើយពិនិត្យមើលសាំងគេចពន្ធកុំឲ្យចូល ហើយប្រៀបធៀបទៅលើតម្លៃប្រេងឥន្ធនៈបរទេស ហើយប្រៀបធៀបទៅនឹងការនាំចូល ពីព្រោះពន្ធអត់មានឡើងទេ ហេតុអ្វីបានជាសាំងឡើង នេះហើយជាយន្តការលំអិត[ជោគជ័យ]»។
យោងតាមលិខិតជូនដំណឹងរបស់ក្រសួងពាណិជ្ជកម្មចុះថ្ងៃទី១២ ខែកុម្ភៈ ស្តីពីថ្លៃលក់ប្រេងឥន្ធនៈនៅតាមស្ថានីយទាំងអស់ សម្រាប់លក់រយៈពេល ១០ថ្ងៃ គឺចាប់ពីថ្ងៃទី១២ ដល់ ២១ ខែកុម្ភៈ ឆ្នាំ២០១៨នេះ តម្លៃសាំងធម្មតាត្រូវលក់មិនឲ្យលើសពី៣,៩៥០រៀលក្នុង១លីត្រ ម៉ាស៊ូតម្លៃ ៣,៧៥០រៀលក្នុង១លីត្រ ដែលនៅក្នុងនោះក្រសួងមិនបានកំណត់តម្លៃប្រេងសំាងស៊ុបពែនោះឡើង ខណៈសាំងស៊ុបពែតម្លៃ៤២៥០រៀល ក្នុងមួយលីត្រ៕
