កូនប្រុសរបស់ស្នងការរងនគរបាលខេត្តព្រៃវែង ត្រូវបានតុលាការសម្រេចដាក់ពន្ធនាគារ បន្ទាប់ពីត្រូវបានចាប់ខ្លួនក្រោមការចោទថា បានគំរាមបាញ់សម្លាប់ និងចាប់បង្ខាំងនារីម្នាក់រយៈពេល ៤ខែ ដើម្បីរំលោភសេពសន្ថវៈ និងលក់បន្តទៅឲ្យអ្នកផ្សេង។
ក្នុងដីកាកាលពីថ្ងៃម្សិលមិញនេះ ចៅក្រមស៊ើបសួរនៃសាលាដំបូងខេត្តព្រៃវែង លោក សាំង សេរី បានបង្គាប់ឲ្យឃុំខ្លួនដាក់ពន្ធនាគារមន្ត្រីនគរបាលឈ្មោះ ឌឹម មករា កូនប្រុសស្នងការរងនគរបាលខេត្តព្រៃវែង លោក ឌឹម យ៉ារ៉ុម។
បើតាមដីកាដដែរលនេះ ជនសង្ស័យ ឌឹម មករា អាយុ ៣៣ឆ្នាំ ដែលជានាយករងផ្នែកអគ្គីភ័យរបស់នគរបាលខេត្តព្រៃវែងផងនោះ ត្រូវបានតុលាការចោទពីបទអំពើរំលោភសេពសន្ថវៈ បង្ខាំងមនុស្សខុសច្បាប់ និងសញ្ចារកម្ម។
របាយការណ៍នគរបាលជាតិ បានឲ្យដឹងថា មន្ត្រីនគរបាលរូបនេះត្រូវបានសមត្ថកិច្ចចាប់ខ្លួនកាលពីថ្ងៃទី១០ ខែឧសភា បន្ទាប់ពីនារីម្នាក់បានដាក់ពាក្យប្ដឹងទៅសមត្ថកិច្ច ដោយបានចោទកូនប្រុសស្នងការរងរូបនេះថា បានបង្ខាំងរូបរាងកាយ និងចាប់រំលោភនាងអស់រយៈពេល ៤ខែមកហើយ បន្ទាប់មកថែមទាំងលក់នាងទៅឲ្យប្រុសផ្សេងថែមទៀត និងគំរាមបាញ់សម្លាប់នាងផងដែរ។
បើតាមគេហទំព័រនគរបាលជាតិ កូនប្រុសស្នងការរងនគរបាលខេត្តព្រៃវែងរូបនេះ ត្រូវបានសមត្ថកិច្ចចាប់ខ្លួន បន្ទាប់ពីមានបញ្ជាពីអគ្គស្នងការនគរបាលជាតិ លោក នេត សាវឿន៕
