លទ្ធផលនៃការរាប់សន្លឹកឆ្នោតឡើងវិញនៅតាមការិយាល័យចំនួន ១៩ នៅក្នុងឃុំដូង ខេត្តស្វាយរៀង បង្ហាញថា គណបក្សសង្គ្រោះជាតិបានទទួលសំឡេងគាំទ្រនាំមុខគណបក្សប្រជាជនកម្ពុជាដល់ទៅ ២៦៦សំឡេង ខណៈដែលការរាប់សន្លឹកឆ្នោតនៅក្នុងឃុំនេះទាំងមូល មិនទាន់ចប់សព្វគ្រប់នៅឡើយទេ។
គ.ជ.ប. កាលពីសប្ដាហ៍មុន បានប្រកាសឲ្យរាប់សន្លឹកឆ្នោតឡើងវិញនៅតាមការិយាល័យបោះឆ្នោតសរុបចំនួន ២៣ នៅក្នុងឃុំដូង ស្រុករមាសហែក បន្ទាប់ពីមានការប្ដឹងជំទាស់ទាំងពីគណបក្សប្រជាជនកម្ពុជា និងគណបក្សសង្គ្រោះជាតិ។
លទ្ធផលនៃការរាប់សន្លឹកឆ្នោតឡើងវិញនៅតាមការិយាល័យចំនួន ១៩ កាលពីថ្ងៃម្សិលមិញនេះ ដែលវីអូឌីទទួលបាននៅថ្ងៃនេះ បង្ហាញថា គណបក្សសង្គ្រោះជាតិទទួលបានសំឡេងគាំទ្រចំនួន ២២៩២សំឡេង ខណៈដែលគណបក្សប្រជាជនកម្ពុជាទទួលបានសំឡេងគាំទ្រចំនួន ២០២៦សំឡេង ដោយបក្សប្រឆាំងនាំមុខចំនួន ២៦៦សំឡេង។
ទោះជាយ៉ាងណា នេះគ្រាន់តែជាលទ្ធផលនៃការរាប់សន្លឹកឆ្នោតនៅតាមការិយាល័យត្រឹមចំនួន ១៩ ក្នុងចំណោមការិយាល័យសរុប ២៣ នៅក្នុងឃុំនេះ។
លទ្ធផលបណ្ដោះអាសន្ននៃការបោះឆ្នោតក្រុមប្រឹក្សាឃុំ-សង្កាត់ដែលផ្សាយដោយ គ.ជ.ប. បង្ហាញថា គណបក្សសង្គ្រោះជាតិបានឈ្នះនៅឃុំដូង ជាមួយសំឡេងនាំមុខគណបក្សប្រជាជនកម្ពុជាត្រឹមតែ ៣សំឡេងតែប៉ុណ្ណោះ ដោយបក្សប្រឆាំងទទួលបានសំឡេងឆ្នោតគាំទ្រ ២៥៩៩សំឡេង៕