កងកម្លាំងប្រដាប់អាវុធចល័តក្បែរស្នាក់ការកណ្តាលរបស់គណបក្សសង្គ្រោះជាតិ នៅក្នុងសង្កាត់ចាក់អង្រែលើក្នុងរាជធានីភ្នំពេញ នៅយប់រំលងអធ្រាត្រថ្ងៃចន្ទឈានចូលថ្ងៃអង្គារនេះ។
នៅអំឡុងពេលម៉ោង១២និងម៉ោង១យប់ថ្ងៃចន្ទឈានចូលថ្ងៃអង្គារ មានរថយន្តដឹកកម្លាំង ប្រមាណ៣០ទៅ៤០គ្រឿងបើកចល័តកាត់ និងចល័តក្បែរស្នាក់ការគណបក្សសង្គ្រោះជាតិ។
លោក កឹម សុខា ប្រធានស្តីទីគណបក្សសង្គ្រោះជាតិសរសេរនៅលើហ្វេសប៊ុករបស់លោកនៅព្រឹកនេះថា កងកម្លាំងទាំងនោះបានបើករថយន្តទៅនិងមក ហើយមានពេលខ្លះពួកគេឈប់នៅមុខស្នាក់ការគណបក្សប្រឆាំងនេះ៖ «យប់ថ្ងៃទី១២ រហូតដល់ពាក់កណ្តាលអាធាត្រ មានរថយន្តដែលផ្ទុកដោយកងកម្លាំងប្រដាប់អាវុធជា ច្រើនចរាចរទៅមកនិងឈប់ នៅមុខស្នាក់ការគណបក្សសង្គ្រោះជាតិយ៉ាងយូរ»។
ការចល័តកម្លាំងនេះធ្វើឡើងតែប៉ុន្មានម៉ោងក្រោយពេលដែលលោកនាយករដ្ឋមន្ត្រី ហ៊ុន សែន ព្រមានប្រើកម្លាំងបង្ក្រាប បើសិនជាគណបក្សសង្គ្រោះជាតិរៀបចំមហាបាតុកម្មជាថ្មីទៀតនោះ។
កាលពីថ្ងៃទី៣១ខែសីហាកន្លងទៅមានការចល័តឧទ្ធម្ភាចក្រ កម្លាំងជើងទឹក និងជើងគោកនៅជិតស្នាក់ការគណបក្សសង្គ្រោះជាតិ។ ប៉ុន្តែមន្ត្រីរដ្ឋាភិបាលអះអាងថា ការល័តនោះមិនមែនជាការបំភ័យពលរដ្ឋឬគណបក្សសង្គ្រោះជាតិទេ គឺជាការត្រៀមសម្រាប់ហាត់សមសម្រាប់ការប្រារព្ធរៀបចំខួបកងកម្លាំងអង្គរក្ស។
