អតីតមេដឹកនាំគណបក្សប្រឆាំង លោក សម រង្ស៊ី បានលើកឡើងថា ខ្មែរត្រូវរៀបចំប្រទេសឡើងវិញ ដើម្បីជួយប្រជាពលរដ្ឋក្រីក្រឲ្យជៀសផុតពីបំណុលវ័ណ្ឌក។
លោក សម រង្ស៊ី លើកឡើងដូច្នេះ តែមួយថ្ងៃក្រោយពីរដ្ឋាភិបាលកម្ពុជាបានសម្រេចទម្លាក់កម្រិតអត្រាការប្រាក់អតិបរមាមកនៅត្រឹម១៨ភាគរយក្នុងមួយឆ្នាំ។
នៅលើទំព័រហ្វេសប៊ុករបស់លោកកាលពីថ្ងៃម្សិលមិញនេះ លោក សម រង្ស៊ី ដែលកំពុងរស់នៅនិរទេសខ្លួនឯងនៅក្រៅប្រទេសនោះ បានរៀបរាប់ថា ខ្មែរយើងត្រូវរៀបចំប្រទេសឡើងវិញ ដើម្បីជួយប្រជាពលរដ្ឋក្រីក្រ ជាពិសេស កសិករឲ្យមានទីផ្សារលក់ផលដំណាំក្នុងតម្លៃខ្ពស់សមរម្យ ជៀសវាងការធ្វើស្រែធ្វើចម្ការ ជំពាក់លុយគេវ័ណ្ឌករ អស់សង្ឃឹម ហើយបង្ខំចិត្តចំណាកស្រុក ទៅស៊ីឈ្នួលគេនៅប្រទេសជិតខាង កាន់តែច្រើនឡើងៗ។
បើទោះបីជាបានប្រកាសលាលែងពីតំណែងជាប្រធានបក្សសង្គ្រោះជាតិកាលពីថ្ងៃ១១ ខែកុម្ភៈកន្លងមកនេះក៏ដោយ លោក សម រង្ស៊ី បានថ្លែង និងបង្ហោះសារនយោបាយជាបន្តបន្ទាប់នៅលើទំព័រហ្វេសប៊ុករបស់លោក៕
