មានការកត់សម្គាល់គួរសម បន្ទាប់ពីរឿង «កំពូលល្ងង់នៅអាស៊ី» ត្រូវបានគេអះអាងថាជាស្នាដៃនិងជាការបោះទុនទាំងស្រុងរបស់អតីតពលករមកពីប្រទេសកូរ៉េម្នាក់ ដែលក្នុងពេលនេះគឺមិនត្រឹមតែជាថៅកែកុនប៉ុណ្ណោះទេ គឺថែមទាំងមានក្រុមហ៊ុនអចលនទ្រព្យធំមួយនិងមានក្លឹបកម្សាន្តជាមុខជំនួញផ្ទាល់ខ្លួនខុសប្លែកពីជីវិតពលករដែលចប់ការងារនៅក្រៅប្រទេសផ្សេងទៀត។
ក្រៅពីការផលិតខ្សែរឿងខាងលើ ផលិតករជាអតីតពលកររូបនេះក៏ប្រកាសពីមហិច្ឆតាផលិតរឿងដុំនិងរឿងភាគដើម្បីប្រកួតប្រជែងទីផ្សារភាពយន្តនោះផង។
លោក ឡេង ណាវ៉ាត់ត្រា ដែលបានអះអាងថាជាពលករបម្រើការនៅក្នុងប្រទេសកូរ៉េនៅចន្លោះឆ្នាំ២០១០ដល់២០១៥ បានប្រាប់វីអូឌីក្នុងពេលចេញថតរឿង «កំពូលល្ងង់នៅអាស៊ី» នៅម្ដុំជើងភ្នំបាសិទ្ធថា ដោយសារតែការយកលុយបង្កើតលុយតាមរយៈបង្កើតគម្រោងមុខជំនួញពីតូចទៅធំ ទើបធ្វើអោយលោកបានក្លាយជាថៅកែក្រុមហ៊ុនអចលនទ្រព្យធំមួយ ជាម្ចាស់ក្លឹបកម្សាន្ត និងចុងក្រោយក៏បានបោះទុនបង្កើតផលិតកម្មចម្រៀង និងផលិតកម្មភាពយន្តឈ្មោះ Galaxy ក្រោយបញ្ចប់ការងារនៅក្នុងប្រទេសកូរ៉េ។
លោកថាបានចំណាយថវិកាជាច្រើនក្នុងការស្ថាបនាស្ទូឌីយោចម្រៀងនិងរៀបចំក្រុមការងារជំនាញច្បាស់លាស់ មុនពេលដែលលោកសម្រេចចិត្តបង្កើតផលិតកម្មចម្រៀងនិងចុះថតរឿង «កំពូលល្ងង់នៅអាស៊ី» ដែលជារឿងបើកឆាកនេះ។
លោក ឡេង ណាវ៉ាត់ត្រា មានប្រសាសន៍ថាខ្សែរឿង «កំពូលល្ងង់នៅអាស៊ី» គឺជារឿងទី១ដែលលោកធ្វើឡើងក្នុងគោលបំណងបង្ហាញថា អតីតអ្នកធ្វើការនៅក្នុងប្រទេសកូរ៉េក៏អាចក្លាយជាអ្នកផលិតរឿងឲ្យជោគជ័យបានដែរ ប្រសិនបើបុគ្គលម្នាក់នោះមានឆន្ទៈពេញលេញ។
លោកថាខ្សែរឿងរបស់លោកគ្រោងចំណាយជាង៥ម៉ឺនដុល្លារ ដោយមិនទាន់រាប់បញ្ចូលការចំណាយនានាដើម្បីផលិតកុននេះនៅឡើយផង។
យោងតាមការបញ្ជាក់ខ្សែរឿង «កំពូលល្ងង់នៅអាស៊ី» គឺជារឿងដែលមានឈុតភ័យរន្ធត់និងកំប្លែង ដោយសារតែភាពល្ងង់របស់តួអង្គ៤រូប ដែលសម្ដែងដោយនាយពែកមី នាយគ្រឿន ឌីជេកណ្ដុរ និងតារាចម្រៀងលោក ម៉ារ៉ា ប៊ុណ្ណា។
លោក ឡេង ណាវ៉ាត់ត្រា បញ្ជាក់ថាខ្សែរឿង «កំពូលល្ងង់នៅអាស៊ី» ជារឿងដែលលោកគ្រោងនាំចេញយកទៅចាក់បញ្ចាំងឲ្យពលករខ្មែរបម្រើការនៅក្នុងប្រទេសកូរ៉េបានទស្សនា ប្រសិនបើខាងរោងកុនរបស់ប្រទេសកូរ៉េយល់ព្រម។
លោកនិយាយថា៖ “សម្រាប់បទពិសោធន៍កុនខ្ញុំ គឺមានតិច ប៉ុន្តែមុនខ្ញុំបើកផលិតកម្មហ្នឹងខ្ញុំសិក្សាច្រើនមែនទែនជាមួយអ្នកជំនាញកុន! សូម្បីតែបងពែកមី ក៏ដូចជាដៃគូមួយរបស់ខ្ញុំនោះដែរ ទើបខ្ញុំអត់មានភ័យរឿងធ្វើកុនហើយមិនបានល្អ! ”។
ដោយឡែកសម្រាប់វិស័យចម្រៀង លោកថាខ្លួនយល់ដឹងច្រើន ដោយសារតែក្នុងរយៈពេលបម្រើការនៅក្នុងប្រទេសកូរ៉េគឺលោកហាត់រៀននិពន្ធប៉ារ៉ូលច្រៀងនិងចេះបទភ្លេងបានស្ទាត់។
លោក ចែម ចាន់ដ៉ារ៉ា ហៅពែកមី បានអះអាងថាការផលិតរឿង «កំពូលល្ងង់នៅអាស៊ី» លោកពិតជាបានរួមចំណែកជួយឲ្យលេចរូបរាង ដើម្បីកុំឲ្យសាច់រឿងមួយនេះមានឈុតច្រំដែលនឹងរឿងដែលគេផលិតហើយសម្រាប់សាច់រឿង និងជួយពាក់ព័ន្ធនឹងបច្ចេកទេសជួយឲ្យផលិតកម្ម Galaxy មិនស្ថិតក្នុងភាពប្រថុយប្រថាន។
លោកនិយាយថា៖ “ […] រឿងហ្នឹងគឺខ្ញុំជួយគាត់ តាំងពីជួយកែសាច់រឿងគាត់! តាំងពីជួយទាក់ទងឲ្យគាត់ស្គាល់ផលិតករល្អៗ! រឿងហ្នឹងថ្មីតែផលិតកម្មទេ តែបើតួសម្ដែងនិងក្រុមផលិតគឺម្នាក់ៗ មានបទពិសោធន៍ច្រើនឆ្នាំ […] !”។
លោកថាខ្សែរឿង «កំពូលល្ងង់នៅអាស៊ី» នឹងក្លាយជារឿងទី១របស់អតីតពលករនៅកូរ៉េដែលនឹងទទួលបានជោគជ័យនៅលើទីផ្សារភាពយន្ត៕