សារព័ត៌មានសិង្ហបុរី Channel News Asia បានផ្សាយថា រោងចក្រជិត ៣០កន្លែងនៅក្នុងទីក្រុងធានជីនរបស់ប្រទេសចិន ត្រូវបានគេឆ្មក់ចូលបង្ក្រាប ដោយសារផលិតអាហារក្លែងស្លាកយីហោ និងមានគ្រឿងផ្សំខូចគុណភាព។
បើតាមសារព័ត៌មានដដែលនេះ ផលិតផលនេះ ត្រូវបានដាក់ស្លាកយីហោល្បីៗនៅក្នុងស្រុក និងស្លាកយីហោអន្តរជាតិ ដូចជា យីហោ Neste ជាដើម។ ផលិតផលទាំងនោះ រួមមានសាច់ក្រក និងគ្រឿងផ្សំសិប្បនិម្មិត។
កាសែតចិន The Beijing News បានផ្សាយថា ផលិតផលទាំងនោះ ត្រូវបានគេចរាចរលក់នៅទូទាំងប្រទេសចិន។
រីឯកាសែតហុងកុង South China Morning Post បានផ្សាយថា ផលិតផលក្លែងម៉ាកយីហោតម្លៃដល់ទៅជាង ១៤លានដុល្លារ ត្រូវបានគេផលិតក្នុងមួយឆ្នាំៗ នៅក្នុងសង្កាត់តូចមួយ ស្ថិតនៅក្នុងទីក្រុងធានជីន។
ប្រទេសចិន នៅពេលថ្មីៗនេះ ពោរពេញទៅរឿងអាស្រូវផលិតអាហារក្លែងក្លាយ ដោយគេបានរកឃើញអាហារក្លែងក្លាយកន្លះលានករណីកាលពីដើមឆ្នាំកន្លងមក៕