ព័ត៌មានដាច់ដោយឡែកមួយទៀត បានឲ្យដឹងថា សមាគមសហព័ន្ធខ្មែរ-វៀតណាមនៅព្រះរាជាណាចក្រកម្ពុជា បានបដិសេធចំពោះការបង្ហោះសារប្រមាថមើលងាយព្រះមហាក្សត្រ និងគ្រួសាររាជវង្សខ្មែរ។
កាលពីពេលថ្មីៗនេះ ទំព័រហ្វេសប៊ុកដែលមានឈ្មោះថា សមាគមវៀតណាមនៅកម្ពុជា បានបង្ហោះសារមានលក្ខណៈប្រមាថជាបន្តបន្ទាប់ ដែលជំរុញឲ្យមានប្រតិកម្មយ៉ាងខ្លាំងពីប្រជាជនកម្ពុជា។
ក្នុងសេចក្ដីថ្លែងការណ៍កាលពីថ្ងៃទី១៦ ខែមីនានេះ សមាគមសហព័ន្ធវៀតណាមនៅព្រះរាជាណាចក្រកម្ពុជា បានបដិសេធថា ទំព័រហ្វេសប៊ុកនោះ មិនមែនជារបស់ខ្លួនឡើយ ដោយថា សមាគមនេះមិនដែលបង្កើតទំព័រហ្វេសប៊ុកណាមួយឡើយ។
សមាគមបានបញ្ជាក់ថា សមាគមបានដូរឈ្មោះជាផ្លូវការតាំងពីឆ្នាំ២០១១មកម៉្លេះ មិនមែនឈ្មោះសមាគមវៀតណាមនៅកម្ពុជាទៀតនោះឡើយ។
សមាគមវៀតណាមបានអះអាងថា ខ្លួនតែងតែគោរពព្រះមហាក្សត្រ និងច្បាប់របស់កម្ពុជា ហើយខ្លួនបានស្នើទៅអាជ្ញាធរកម្ពុជា ឲ្យចាត់វិធានការទៅលើជនដែលបានបង្កើតទំព័រហ្វេសប៊ុកនោះ៕