ពលរដ្ឋជាង៣០នាក់ដែលថាតំណាងឲ្យពលរដ្ឋ១៦៣គ្រួសារបានចុះទៅរុះរើផ្ទះរបស់អតីតតំណាងរបស់ខ្លួន នៅខ័ណ្ឌសែនសុខ រាជធានីភ្នំពេញដោយថា បានដីយកតែខ្លួនឯងបន្ទាប់ពីតុលាការសម្រេចឲ្យក្រុមពួកគាត់ឈ្នះក្តី។
នៅព្រឹកថ្ងៃទី១៨ មេសានេះតុលាការបានសម្រេចអនុវត្តន៍សាលដីការរុះរើផ្ទះនៅលើដីឡូត៏របស់ពលរដ្ឋម្នាក់នៅ ភូមិរោងចក្រ សង្កាត់គោកឃ្លាង ខណ្ឌសែនសុខ ដើម្បីបែងចែកដីទៅឲ្យពលរដ្ឋ១៦៣គ្រួសារដែលបានឈ្នះក្តី។
ក្នុងពេលចុះទៅរុះរើនោះតំណាងអ្នករុះរើម្នាក់លោក ហួយ ថន បានរៀបរាប់ប្រាប់អ្នកយកសារព័ត៌មានថា ផ្ទះដែលពួកគេចុះមករុះរើជាមួយកម្លាំងអាជ្ញាធរនៅព្រឹកនេះ ជាផ្ទះរបស់អតីតតំណាងខ្លួនអ្នកស្រីជា សារ៉ុម ដែលបានទទួលការទុកចិត្តពីពលរដ្ឋនៅឆ្នាំ២០០៥ តវ៉ាក្តីជាមួយក្រុមហ៊ុនគឹម ហាប់ និងអាជ្ញាធរ ដែលបានវាតដីរបស់ពលរដ្ឋ។
លោកបន្តថានៅឆ្នាំ២០១២បន្ទាប់តុលាការសម្រេចឲ្យពលរដ្ឋឈ្នះក្តី បែរជាត្រូវអ្នកស្រី ជា សារ៉ុម សម្រេចវាតយកដីនេះតែម្នាក់ឯង និងមិនបានបែងចែកទៅឲ្យប្រជាពលរដ្ឋ ទើបមានការតវ៉ារហូតដល់តុលាការសម្រេចឲ្យរុះរើផ្ទះ របស់អ្នកស្រីជា សារ៉ុមនាពេលនេះ។
លោកថា៖ « សាលដីកាហ្នឹងឲ្យចែក១៦៣គ្រួសារ តែតំណាងហ្នឹងក្រោយគាត់បានមកគាត់ក្បត់(អ្នកស្រីជា សារ៉ុម) គាត់ក្បត់គាត់អត់ចែកទេ គាត់ថាដីហ្នឹងបានទៅគាត់។ គាត់ក្តីក្តាំងឈ្នះតែគាត់! ដល់ពួកយើងក្តីក្តាំងមិនសុខចិត្ត បានតវ៉ាក្តីដកតំណាងហ្នឹងចេញព្រោះតំណាងហ្នឹងក្បត់អត់ចែកដីឲ្យប្រជាពលរដ្ឋបានដាក់តំណាងថ្មីវិញ » ។
ពាក់ព័ន្ធនឹងរៀងនេះអ្នកស្រី ជា សារ៉ុម បានអះអាងថាអ្នកស្រីមិនមែនមានបំណងវាតយកដីនេះតែម្នាក់ឯងនោះទេ និងបានចោទពលរដ្ឋទាំងនោះវិញថាជាអ្នកដែលត្រូវបានក្រុមហ៊ុនគឹម ហាប់ ជួលមកបំផ្លាញផ្ទះរបស់គាត់នៅលើដីនោះ។ អ្នកស្រីបន្តថាអ្នកស្រីនឹងប្តឹងតវ៉ាចំពោះករណីនេះទៅតុលាការបន្តទៀត។
អ្នកស្រីថា៖ « ទើបតែឈ្នះក្តីនៅថ្ងៃទី២៨ ខែ៣ ឆ្នាំ២០១៨ហ្នឹង អញ្ចឹងពេលវេលាចែកចាយមិនទាន់អាចធ្វើបានទេក្មួយ ព្រោះពេលវេលាខ្លី ទើបតែឈ្នះមិនទាន់បាន១០ថ្ងៃផងហ្នឹង! ២០១៥ មកខ្ញុំឈ្នះរហូតតែចប់ត្រឹមឆ្នាំ២០១៨នេះឯង ថ្ងៃ២៨ ទុករយៈពេលមួយខែអត់តវ៉ា សួរទៅថាខ្ញុំមានពេលឯណាចាត់ចែង ហើយយើងអត់មានពេល រៀបចំកូនចៅមកចឹងៗទេ » ។
បើតាមពលរដ្ឋដីដែលមានទំនាស់នោះមានទំហំជាង៩ពាន់មែត្រការ៉េ ដែលអាចបែងចែកដីឲ្យពលរដ្ឋក្នុងមួយគ្រួសារបានជិត៥០ម៉ែត្រការ៉េ៕