រដ្ឋាភិបាលកម្ពុជា អះអាងថា នៅឆ្នាំ២០១៧កន្លងទៅ ការនាំចេញទំនិញទៅកាន់ទីផ្សារអាមេរិក បានកើនឡើងជិត ៩ភាគរយ បើធៀបនឹងការនាំចេញកាលពីឆ្នាំ២០១៦។
ទីភ្នាក់ងារសារព័ត៌មានជាតិកម្ពុជា AKP បានដកស្រង់របាយការណ៍ក្រសួងពាណិជ្ជកម្ម ចុះផ្សាយថា កម្ពុជានាំចេញទំនិញនានាទៅលក់នៅទីផ្សារអាមេរិក មានទំហំ ៣ពាន់ ៦៤លានដុល្លារ ជាមួយកំណើន ៨.៨៨ភាគរយ បើធៀបនឹងទំហំនៃការនាំចេញកាលពីឆ្នាំ២០១៦កន្លងមក ដែលមានតម្លៃ ២ពាន់ ៨១៤លានដុល្លារ។
បើតាម AKP ផលិតផលដែលកម្ពុជានាំទៅលក់នៅទីផ្សារដ៏ធំទី២របស់ខ្លួននេះ រួមមានផលិតផលសម្លៀកបំពាក់ និងស្បែកជើង និងវ៉ាលីសម្រាប់អ្នកដំណើរជាដើម។
ប៉ុន្ដែ សម្រាប់ការនាំចូលទំនិញពីអាមេរិកវិញ របាយការណ៍នោះបង្ហាញថា មានទំហំទឹកប្រាក់ ៤០០លានដុល្លារ ឬកើនឡើង ១១ភាគរយ ពីចំនួន ៣៦០លានដុល្លារនៅឆ្នាំ២០១៦ ហើយផលិតដែលកម្ពុជានាំចូលពីអាមេរិករួមមាន ផលិតផលគ្រឿងអេឡិចត្រូនិក យានយន្ត គ្រឿងចក្រ ឱសថ និងបរិក្ខារពេទ្យ។
ទោះបីជាអះអាងថា ការនាំចេញទៅអាមេរិកមានការកើនឡើង ប៉ុន្ដែ រដ្ឋាភិបាលកម្ពុជា ក៏ទទួលរងការព្រមានដកហូតប្រព័ន្ធអនុគ្រោះពីអាមេរិក និងសហភាពអឺរ៉ុបផងដែរ ជុំវិញបញ្ហានយោបាយនៅកម្ពុជា បន្ទាប់ពីតុលាការរំលាយអតីតគណបក្សប្រឆាំងដ៏ធំនោះ៕
