ផ្ទះសម្បែងពលរដ្ឋយ៉ាងហោចណាស់ ៨ខ្នងនៅក្នុងខេត្តឧត្ដរមានជ័យ បានរងការខូចខាត បន្ទាប់ពីត្រូវខ្យល់កន្ត្រាក់លាយឡំនឹងភ្លៀកបោកបក់លើកាលពីថ្ងៃម្សិលមិញនេះ។ នេះបើតាមទំព័រហ្វេសប៊ុករបស់ក្រសួងធនធានទឹក និងឧតុនិយម។
ក្រសួងនេះបានរៀបរាប់នៅលើទំព័រហ្វេសប៊ុករបស់ខ្លួននៅថ្ងៃនេះថា កាលថ្ងៃម្សិលមិញនេះ ភ្លៀងលាយឡំជាមួយខ្យល់កន្ត្រាក់ បានវាយប្រហារទៅលើភូមិក្រសាំង សង្កាត់បុស្បូវ ក្រុងសំរោង បណ្តាលឲ្យផ្ទះប្រជាពលរដ្ឋចំនួន ០៦ខ្នង របើកដំបូល។
ក្រសួងដដែលនេះ បានឲ្យដឹងទៀតថា កាលពីថ្ងៃទី ១៨ ខែ ឧសភា ផ្ទះពលរដ្ឋចំនួន ០១ខ្នងបានដួលរលំរាបដល់ដី និង ០១ខ្នងផ្សេងទៀតរបើកដំបូល នៅក្នុងភូមិបន្សាយរាក់ សង្កាត់បន្សាយរាក់ ក្រុងសំរោង ដោយសារភ្លៀងធ្លាក់លាយឡំជាមួយខ្យល់កន្ត្រាក់។
ទាក់ទងនឹងបញ្ហានេះដែរកាលពីខែមីនារបាយការណ៍អាជ្ញាធរខេត្ដឧត្ដរមានជ័យ ឲ្យដឹងថា លំនៅឋានប្រជាពលរដ្ឋចំនួន ១១៧ខ្នងផ្ទះស្ថិតនៅក្រុងសំរោងដដែល បានដួលរលំ ប៉ើងដំបូល និងជញ្ជាំង ហើយក្នុងនោះក៏មានលំនៅឋានខ្មែរឥស្លាម ដែលទើបសងថ្មីមានចំនួន ៤៤ខ្នងផងដែរ៕
