ពលរដ្ឋជាង៥០នាក់តំណាងឲ្យពលរដ្ឋ២១០គ្រួសារ ក្នុងខេត្តកោះកុង នៅថ្ងៃនេះបានប្រផ្តុំគ្នាតវ៉ាមុខ ក្រសួងបរិស្ថាន ដើម្បីទាមទារដីធ្លីរបស់ពួកគេ ខណៈវិវាទនោះអូសបន្លាយ១០ឆ្នាំពុំមានដំណោះស្រាយពីអាជ្ញាធរថ្នាក់ក្រោម។
ពលរដ្ឋម្នាក់លោក រួត សុផល ប្រាប់វីអូឌីកន្លែងតវ៉ាថា ពលរដ្ឋ២១០គ្រួសាររស់នៅឃុំភីមាស និងឃុំកោះស្តេច មានជម្លោះដីធ្លីជាមួយក្រុមហ៊ុនញ៉ូញៀន របស់ចិន និងក្រុមហ៊ុន SEZ របស់លោក លីយ៉ុងផាត់តាំងពីឆ្នាំ ២០០៨។
លោកបន្តថា កន្លងមកក្រុមអ្នកភូមិបានរកកិច្ចអន្តរាគមន៍ពីអាជ្ញាធរថ្នាក់មូលដ្ឋាន រហូតស្ថាប័នរដ្ឋកំពូលៗមួយចំនួនទៀត ប៉ុន្តែមិនទទួលបានដំណោះស្រាយទេ ហើយកាលពីម្សិលម៉ិញនេះ ក្រុមពលរដ្ឋបានរកកិច្ចអន្តរាគមន៍ពីក្រសួងរៀបចំដែនដីម្តងទៀត ដោយមន្រ្តីក្រសួងប្រាប់ថា ករណីវិវាទដីធ្លីរបស់ពួកគេគឺស្ថិតក្នុងដែនសមត្ថកិច្ចរបស់ក្រសួងបរិស្ថានជាអ្នកដោះស្រាយ។
ពលរដ្ឋម្នាក់លោក រួត សុផល ដែលមានវិវាទដីធ្លីជាមួយក្រុមហ៊ុន ញូញៀន
ពលរដ្ឋម្នាក់ទៀតលោក សែម ធី និយាយថា បើដីរបស់ពួកគាត់ស្ថិតក្នុងតំបន់អភិរក្សឧទ្យានជាតិ ហេតុអ្វីបានជាក្រុមហ៊ុនមានសិទ្ធិទទួលបានដីសម្បទានសេដ្ឋកិច្ចនៅទីនោះដែរ។
លោកបន្តថា ជុំវិញវិវាទដីធ្លីជាមួយក្រុមនោះ គឺគ្រួសារគាត់ប៉ះពាល់ដីស្រចម្ការ និងលំនៅឋានសរុបទាំងអស់ជាង១០ហិកតា។
ពលរដ្ឋម្នាក់ទៀតលោក សែម ធី
បុរសម្នាក់ដែលអះអាងថា ជាមន្រ្តីក្រសួងបរិស្ថានដែលប្រាប់ថាឈ្មោះ យា រ៉ែន បានប្រាប់ទៅក្រុមពលរដ្ឋឲ្យត្រឡប់ទៅខេត្តកោះកុងវិញ ដោយសន្យាចុះដោះស្រាយតាមក្រោយ ប៉ុន្តែក្រុមអ្នកភូមិមិនព្រម ដោយពួកគេទាមទារជួបជាមួយរដ្ឋមន្រ្តីក្រសួងបរិស្ថាន លោក សាយ សំអាល់ ផ្ទាល់ ដោយរហូតមកដល់ម៉ោង៣រសៀលនេះពលរដ្ឋទាំងនោះមិនទាន់ចេញពីមុខក្រសួងនៅឡើយទេ។
ពលរដ្ឋអះអាងថា ពួកគាត់២១០គ្រួសារ និងទំហំដីប្រមាណ៦ពាន់ហិកតាស្ថិតក្នុងស្រុកគីរីសាគរ ត្រូវបានក្រុមហ៊ុនញ៉ូញៀនរបស់ចិន និងក្រុម SEZ របស់លោក លីយ៉ុងផាត់រំលោភយកកាលពីឆ្នាំ២០០៨ ហើយពលរដ្ឋ អះអាងទៀតថា ជុំវិញវិវាទដីនេះ តំណាងពួកគាត់ម្នាក់ត្រូវបានតុលាការខេត្តកោះកុងសម្រេចឃុំខ្លួនដោយចោទថា បានចាប់យកដីគេខុសច្បាប់។
កាលពីថ្ងៃទី ១៣ខែមិថុនា រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅកាន់រដ្ឋបាលខេត្តនានាឲ្យដោះស្រាយវិវាទដីធ្លីក្នុងខេត្តរបស់ខ្លួនឲ្យមានប្រសិទ្ធភាព និងរក្សាភាពអត់ធ្មត់ក្នុងការបំពេញការងារពាក់ព័ន្ធនឹងបញ្ហាទំនាស់ដីធ្លី ឬការតវ៉ាទាមទារនានារបស់ប្រជាពលរដ្ឋ ខណៈប៉ុន្មានខែចុងក្រោយនេះក្រុមពលរដ្ឋមានជម្លោះដីធ្លីបន្តឡើងមកតវ៉ានៅរាជធានីភ្នំពេញជាបន្តបន្ទាប់៕