ពលករខ្មែរម្នាក់ជាន់មីនផ្ទុះដាច់ជើងម្ខាង និង រងរបួសធ្ងន់ធ្ងរបន្ទាប់ពីវិលត្រលប់ពីប្រទេសថៃវិញ ដោយដើរវង្វេងកាត់ព្រៃក្នុងតំបន់ ស ដែលជាតំបន់ហាមឃាត់ នៅតាមបណ្តោយព្រំដែនកម្ពុជានិងថៃ។
គេហទំព័ររបស់អគ្គស្នងការដ្នាននគរបាលជាតិ ចុះផ្សាយនៅថ្ងៃទី១៤ ខែ ឧសភា ឲ្យដឹថានៅរសៀលថ្ងៃទី១៤ ខែឧសភា នេះមានពលករប្រមាណជា ១០ នាក់បានវិលត្រលប់ពីប្រទេសថៃវិញ ដើរកាត់ព្រៃក្នុងតំបន់ ស ស្ថិតនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត បណ្ដាលឲ្យយុវជនម្នាក់ជាន់ចំមីនផ្ទុះ ដាច់ជើងខាងស្ដាំ។
បើតាមអគ្គស្នងការដ្នាននគរបាលជាតិដដែលឲ្យដឹងថា ជនរងគ្រោះឈ្មោះ ជ្រក់ សែត ភេទប្រុស អាយុ ១៦ឆ្នាំ មកពីភូមិគោកកក់ ឃុំ ស្វាយចេក ស្រុកអង្គរធំ ខេត្តសៀមរាប។ បន្ទាប់ពីហេតុការណ៍កើតឡើងសមត្ថកិច្ចនគរបាលការពារព្រំដែនគោកលេខ ៩១១ ប៉ុស្តិ៍ព្រៃគប់បានចូលទៅសង្គ្រោះ និង ដឹកជនរងគ្រោះយកទៅព្យាបាលនៅមន្ទីរពេទ្យបង្អែកក្រុងប៉ោយប៉ែត៕