ប្រព័ន្ធផ្សព្វផ្សាយរដ្ឋចិនបានរាយការណ៍ថា ទីក្រុងចិនមួយបានហាមឃាត់សិស្សសាលាមិនឲ្យហែកសៀវភៅមេរៀនឬក៏ស្រែកនៅក្នុងបរិវេណសាលារៀន ដើម្បីរំសាយសម្ពាធបណ្ដាលមកពីការប្រឡង។
កាសែត China Youth Daily បានរាយការណ៍ថាការហាមឃាត់ដែលធ្វើឡើងដោយការិយាល័យអប់រំទីក្រុងសៀមេនបានកើតឡើងតែ១០ថ្ងៃមុននឹងមានការប្រឡងចូលមហាវិទ្យាល័យថ្នាក់ជាតិ។
សិស្សវិទ្យាល័យជិត១០លាននាក់នៅទូទាំងប្រទេសចិនត្រូវអង្គុយប្រឡងដ៏លំបាករយៈពេលពីរថ្ងៃជារៀងរាល់ឆ្នាំ។
កាសែតនេះបន្តថាសាលារៀនគួរផ្ដល់ការណែនាំចិត្តសាស្ត្រជំនួសវិញ។
ទូរទស្សន៍រដ្ឋចិន CCTV បានរាយការណ៍ថាវិធានការប្លែកៗសម្រាប់ពេលប្រឡងនោះត្រូវបានបង្កើតឡើងប៉ុន្មានឆ្នាំមកហើយ ដោយសារសិស្សបានហែកសៀវភៅពួកគេនិងគ្រវែលចោលនៅតាមអគារសិក្សា។ សិស្សខ្លះជ្រើសរើសយកការស្រែកនៅក្នុងអគារសិក្សា ដើម្បីលើកទឹកចិត្តខ្លួនឯង។
មន្ត្រីទីក្រុងសៀមេនក៏បានជំរុញដល់សាលារៀនឲ្យអនុញ្ញាតដល់សិស្សរំសាយស្ត្រេសតាមវិធីមួយដ៏ល្អសម្រាប់សុខភាព ប៉ុន្តែពុំបានបញ្ជាក់លម្អិតទេ។
ការប្រឡងថ្នាក់នេះហៅថា Gaokao។ វាជាការប្រឡងដើម្បីកំណត់ថា តើសិស្សនឹងបន្តសិក្សានៅមហាវិទ្យាល័យមួយណា។
យុវជនក្មេងៗជនជាតិចិនចាត់ទុកការប្រឡងនេះជាចំណុចរបត់មួយដែលអាចផ្លាស់ប្ដូរជីវិតមនុស្សម្នាក់ ដូចជា កសិករក្រីក្រ ឬវេជ្ជបណ្ឌិត កម្មកររោងចក្រ ឬអ្នកវិទ្យាសាស្ត្រ។
ការប្រឡងនេះបានរងការរិះគន់ថានាំទៅរកវប្បធម៌កុហកនិងការទន្ទេញចាំ។ នៅពេលលោកអ្នកប្រកួតប្រជែងជាមួយសិស្សរាប់លាននាក់ ដើម្បីឱកាសដ៏តូចចង្អៀតនោះ ការកុហកមានកម្រិតខ្ពស់ហើយលោកអ្នកអាចលឺជនជាតិចិននិយាយរឿងនេះដោយចំហរ។
នៅពេលស្ត្រេសកើនឡើងដល់កម្រិតកំពូលដែលកើតចេញពីការប្រឡងនេះ វានឹងនាំទៅរកវិបត្តិផ្លូវចិត្តនិងអាចធ្វើអត្តឃាតផងដែរ។
លោក Jack Ma ស្ថាបនិកក្រុមហ៊ុន Alibaba ត្រូវអង្គុយប្រឡង Gaokao នេះដល់ទៅ៣ដង ដើម្បីបានចូលរៀននៅមហាវិទ្យាល័យ។ នាយករដ្ឋមន្ត្រីចិន លោក Li Keqiang ធ្លាប់ប្រើការប្រឡងនេះ ដើម្បីចាកចេញពីមហាវិទ្យាល័យអន់មួយនៅខេត្តអានហួយ ទៅរៀននៅមហាវិទ្យាល័យល្បីល្បាញរបស់ចិននៅទីក្រុងប៉េកាំង៕
