បាតុករគាំទ្រលទ្ធិប្រជាធិបតេយ្យរាប់រយនាក់បានដង្ហែក្បួននៅកណ្ដាលទីក្រុងហុងកុង កាលពីថ្ងៃអាទិត្យម្សិលមិញនៅមុនខួបលើកទី២៧ នៃការបង្ក្រាបនៅទីលានធៀនអានមេន នៅទីក្រុងប៉េកាំង កាលពីឆ្នាំ១៩៨៩។
ទីភ្នាក់ងារព័ត៌មាន Reuters បានរាយការណ៍ថាក្រុមមេដឹកនាំគាំទ្រលទ្ធិប្រជាធិបតេយ្យនៅទីក្រុងហុងកុង ដូចជា លោក Lee Cheuk-yan បានអំពាវនាវឲ្យទប់ស្កាត់ការបង្ក្រាបនៅទីលានធៀនអានមេននិងបញ្ចប់របបគ្របគ្រងឯកបក្សនៅចិន។
លោក Lee បាននិយាយថានេះគឺជាខួបលើកទី២៧ឆ្នាំ ហើយប្រជាជននៅទីក្រុងហុងកុងនៅតែអំពាវនាវការពារថ្ងៃទី០៤ ខែមិថុនា និងបញ្ចប់របបគ្រប់គ្រងឯកបក្សនៅចិន។ លោកបន្តថាមនុស្សគ្រប់គ្នាអាចមើលឃើញថា ការបង្ក្រាបដែលកើតឡើងនៅឆ្នាំ១៩៨៩ វាក៏បានឡើងវិញនៅទីក្រុងហុងកុងនាពេលសព្វថ្ងៃនេះដែរ។
ក្រុមអ្នកគាំទ្រក្រុងប៉េកាំងរាប់សិបនាក់ដូចជាលោក Peter Lam បានស្រែកលុបលើក្រុមបាតុករដោយអះអាងថា ពួកគេកំពុងនិយាយបំផ្លើសអំពីហេតុការណ៍នោះ។
លោក Lam និយាយថា៖ «សម្រាប់ខួប២៧ឆ្នាំនេះ ក្រុមមេដឹកនាំប្រជាធិបតេយ្យកំពុងរៀបចំក្បួនដង្ហែរដើម្បីទាញចំណាប់អារម្មណ៍ទៅហេតុការណ៍បង្ក្រាបនៅទីលានធៀនអានមេន។ ខ្ញុំគិតថាវាមិនមែនជាការពិតនោះឡើយ។ មានការបាត់បង់ជីវិតមនុស្សនៅក្នុងបាតុកម្មឆ្នាំ១៩៨៩ ប៉ុន្តែអ្នកស្លាប់ភាគច្រើនគឺជាទាហានព្រមទាំងជាពលរដ្ឋនិងនិស្សិតស្លូតត្រង់»។
ក្រុមមេដឹកនាំប្រជាធិបតេយ្យគ្រោងរៀបចំពិធីស្មឹងស្មាធមួយនៅរាត្រីថ្ងៃទី០៤ ខែមិថុនា ជាការរំលឹកដល់ការបង្ក្រាបនោះ។
ទីក្រុងហុងកុងដែលបានវិលត្រឡប់ទៅស្ថិតក្រោមការគ្រប់គ្រងរបស់ចិនវិញនោះគឺជាដែនដីចិនតែមួយគត់ ដែលរំលឹកដល់ថ្ងៃទី០៤ ខែមិថុនា។ ការជជែកពិភាក្សាអំពីការតវ៉ាឆ្នាំ១៩៨៩ត្រូវបានហាមឃាត់នៅចិនដីគោក។
ចិនបានបញ្ជូនរថក្រោះទៅបំបែកការតវ៉ាដឹកនាំដោយនិស្សិតនៅទីលានធៀនអានមេន ក្នុងទីក្រុងប៉េកាំង កាលពីថ្ងៃទី០៤ ខែមិថុនា ឆ្នាំ១៩៨៩។ ចិនមិនដែលបញ្ចេញតួលេខអ្នកស្លាប់នោះឡើយ ប៉ុន្តែការប៉ាន់ស្មានរបស់ក្រុមសិទ្ធិមនុស្សនិងសាក្សីថាមានចំនួនចាប់ពីច្រើនរយនាក់ទៅច្រើនពាន់នាក់៕