គណបក្សប្រឆាំង កាលពីថ្ងៃម្សិលមិញ បានប្រកាសថា គណបក្សនេះគាំទ្រ “យ៉ាងពេញទំហឹង” ទៅលើសេចក្ដីប្រកាសរួមរបស់បណ្ដាប្រទេសចំនួន ៣៦ ស្ដីពីបញ្ហាសិទ្ធិមនុស្ស នៅក្នុងប្រទេសកម្ពុជា។
កាលពីថ្ងៃទី១៤ខែកញ្ញា ប្រទេសចំនួន ៣៦មានសហរដ្ឋអាមេរិក អាល់បានី អូស្រ្តាលី ជប៉ុន កាណាដា ម៉ាសេដូនី ណ័រវ៉េ ស្វីស អ៊ុយក្រែន និងប្រទេសចំនួន២៨ជាសមាជិកនៃសហភាពអឺរ៉ុបបានបង្ហាញជំហររួមគ្នាថាស្ថានការណ៍នយោបាយនៅកម្ពុជាបានគំរាមកំហែងសកម្មភាពស្របច្បាប់របស់គណបក្សប្រឆាំងនិងអង្គការមិនមែនរដ្ឋាភិបាលដែលធ្វើការផ្នែកសិទ្ធិមនុស្ស។
ប៉ុន្តែ តំណាងរដ្ឋាភិបាលកម្ពុជាប្រចាំអង្គការសហប្រជាជាតិ លោក នៃ សំអុល កាលពីថ្ងៃទី១៤ ខែកញ្ញា បានច្រានចោលសេចក្ដីសម្រេចរួមរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ ដោយថា អង្គការ និងគណបក្សនយោបាយនៅកម្ពុជា កំពុងធ្វើសកម្មភាពដើម្បីកេងចំណេញនយោបាយ។
ទោះជាយ៉ាងណា នៅក្នុងសេចក្ដីប្រកាសព័ត៌មានកាលពីថ្ងៃម្សិលមិញ គណបក្សសង្គ្រោះជាតិ បានប្រកាសថា ខ្លួនគាំទ្រ “ពេញទំហឹង” ទៅលើសេចក្ដីប្រកាសរួមនោះ។
យោងតាមសេចក្ដីប្រកាសរួមនោះ បណ្ដាប្រទេសទាំង ៣៦នោះ បានអំពាវនាវទៅរដ្ឋាភិបាលកម្ពុជា ឲ្យបង្កើតបរិយាកាសនយោបាយមួយ ដែលអង្គការសង្គមស៊ីវិល និងគណបក្សប្រឆាំង អាចធ្វើសកម្មភាពដោយសេរី និងគ្មានការភ័យខ្លាច។
ប្រទេសទាំងនោះ ក៏បានជំរុញទៅរដ្ឋាភិបាលកម្ពុជា ឲ្យអនុញ្ញាតឲ្យមានការបោះឆ្នោតដោយសេរី និងយុត្តិធម៌ ដើម្បីធានាភាពស្របច្បាប់របស់រដ្ឋាភិបាល នៅចំពោះមុខប្រជាពលរដ្ឋ និងសហគមន៍អន្តរជាតិ៕
