សាលាដំបូងរាជធានីភ្នំពេញ បានលើកសវនាការជំនុំជម្រះ លើលោកសម រង្ស៊ី មេដឹកនាំគណបក្សប្រឆាំង ក្នុងសំណុំរឿងបរិហារកេរ្តិ៍ជាសាធារណៈដែលប្តឹងដោយមន្ត្រីគណបក្សប្រជាជនកម្ពុជា។
តាមគម្រោងតុលាការបើកសវនាការនៅថ្ងៃចន្ទនេះ ប៉ុន្តែបានលើកពេលវិញ ដោយមូលហេតុមេធាវីតំណាងដើមបណ្តឹងសុំពន្យារពេលនិងដោយសារអវត្តមានមេធាវីការពារលោក សម រង្ស៊ី ផងដែរ។
បើតាមការឲ្យដឹងពីមន្រ្តីតុលាការសំណុំរឿងនេះនឹងបើកសវនការនៅថ្ងៃទី៨ខែវិច្ឆិកាខាងមុខ។
សំណុំរឿងនេះលោក សោម សឿន រដ្ឋមន្ត្រីប្រតិភូអមនាយករដ្ឋមន្ត្រី បានប្តឹងលោក សម រង្ស៊ី ពីបទបរិហារកេរ្តិ៍ជាសាធារណៈ បន្ទាប់ពីលោក សម រង្ស៊ី បង្ហោះសារនៅលើទំព័រហ្វេសប៊ុករបស់លោកថា លោកនាយករដ្ឋមន្ត្រីហ៊ុន សែន ទិញចំនួនអ្នកចុច Like ក្លែងក្លាយនៅលើទំព័រហ្វេសប៊ុកផ្លូវការរបស់លោក។
តំណាងលោក ហ៊ុន សែន បានប្តឹងទារសំណងជំងឺចិត្តពីលោក សម រង្ស៊ី ចំនួន២០លានរៀល។ ប៉ុន្តែលោក សម រង្ស៊ី ថាលោកមិនខ្វល់នឹងការប្តឹងនេះឡើយ៕