ធនាគារអភិវឌ្ឍន៍អាស៊ីបានអនុម័តផ្តល់ជំនួយជាង៤០លានដុល្លារដល់កម្ពុជា ក្នុងការជួយជម្រុញដល់សេវាធនាគារ បន្ទាប់ពីមើលឃើញថា ជាង៣០%នៃប្រជាពលរដ្ឋខ្មែរ ត្រូវបានផាត់ចេញពីទម្រង់នានានៃសេវាហិរញ្ញវត្ថុ។
ធនាគារអភិវឌ្ឍន៍អាស៊ីបានអនុម័តផ្តល់ជំនួយដល់ប្រទេសកម្ពុជាចំនួន៤០លានដុល្លារនិងផ្លល់ជំនួយឥតសំណង៦០ម៉ឺនដុល្លារបន្ថែមទៀតដល់កម្ពុជា ក្នុងការលើកកំពស់ជម្រុញឲ្យប្រជាពលរដ្ឋមានឱកាសទទួលបានសេវាធនាគារនៅក្នុងប្រទេស។
ធនាគារនេះរំពឹងថាតាមរយៈជំនួយរបស់ខ្លួននេះ កម្ពុជានឹងធ្វើឲ្យផលិតផលក្នុងស្រុករបស់ប្រទេសនេះកើន ៣៩១,២ដុល្លារ ឬស្មើនឹង២,៣%។
បើតាមសេចក្តីប្រកាសនោះ ធនាគារបានឲ្យដឹងថា ប្រជាពលរដ្ឋខ្មែរដែលរស់នៅតាមជនបទ៤១% រកចំនួនបានក្រោម២ដុល្លារ។
សូមរំលឹកផងដែរថា កាលពីពេលថ្មីៗនេះធនាគារនេះក៏មានគម្រោងក្នុងការផ្តល់ជំនួយមកកាន់កម្ពុជាដែលវិនិយោគក្នុងវិស័យសាធារណៈ ដូចជាអប់រំ សាធារណៈការ ដឹកជញ្ជូន និងហេដ្ឋារចនាសម្ព័ន្ធ និងវិស័យផ្សេងៗទៀត ពីឆ្នាំ២០១៧ដល់ឆ្នាំ២០១៩ ក្នុងទឹកប្រាក់ជាង១ពាន់លានដុល្លារផងដែរ។
សម្រាប់ប្រាក់កម្ចីដែលធនាគារនេះបានផ្តល់មកកម្ពុជាពីឆ្នាំ១៩៦៦ រហូតមកដល់ឆ្នាំ២០១៦ នេះមានចំនួនប្រមាណជា២ ៦៥៧លានដុល្លារហើយ៕