ប្រធានាធិបតីជាប់ឆ្នោត លោក ដូណាល់ ត្រាំ បានបង្ហោះសារនៅលើ Twitter ជាថ្មីម្ដងទៀតនៅថ្ងៃនេះ ដោយអះអាងថា កូរ៉េខាងជើងនឹងមិនផលិតគ្រាប់មីស៊ីលបំពាក់ក្បាលគ្រាប់នុយក្លេអ៊ែរដែលអាចបាញ់ទៅដល់ទឹកដីអាមេរិកនោះឡើយ។ នេះដោយការផ្សាយរបស់សារព័ត៌មាន Channel News Asia។
លោក ត្រាំ បានលើកឡើងដូច្នេះ មួយថ្ងៃក្រោយពីមេដឹកនាំ លោក គីម ជុងអ៊ុន ហាក់ដូចជាព្យាយាមដាក់សម្ពាធទៅលើលោក ត្រាំ តាមរយៈការប្រកាសថា ប្រទេសលោកស្ថិតក្នុងដំណាក់កាលចុងក្រោយនៃការអភិវឌ្ឍគ្រាប់មីស៊ីលឆ្លងទ្វីប។
អនាគតប្រធានាធិបតីអាមេរិករូបនេះ រៀបរាប់ថា កូរ៉េខាងជើងគ្រាន់តែប្រកាសថា ខ្លួនស្ថិតក្នុងដំណាក់កាលចុងក្រោយនៃការអភិវឌ្ឍអាវុធនុយក្លេអ៊ែរដែលអាចបាញ់ដល់ទឹកដីអាមេរិក ប៉ុន្តែ វាមិនកើតឡើងនោះឡើយ។
ទោះបីជាក្រុងវ៉ាស៊ីងតោន បានប្ដេជ្ញាដដែលៗថា ខ្លួននឹងមិនទទួលស្គាល់កូរ៉េខាងជើងជារដ្ឋមាននុយក្លេអ៊ែរក៏ដោយ ក៏លោក ត្រាំ បានបញ្ជាក់យ៉ាងច្បាស់កាលពីពេលមុនអំពីគោលនយោបាយរបស់លោក ចំពោះរដ្ឋកុម្មុយនីស្តឯកោមួយនេះ៕