និយ័តករទូរគមនាគមន៍កម្ពុជា រំឭកក្រុមហ៊ុនទូរសព្ទទាំងអស់ ត្រូវបង្កើនបច្ចេកទេស កុំឲ្យអតិថជន របស់ខ្លួន អាចលុបចេញបាន នូវសារជាសំឡេងក្នុងទូរសព្ទដៃ ដែលថា គ្រឹះស្ថានមីក្រូហិរញ្ញវត្ថុទាំងអស់ មិនមែនជារបស់រដ្ឋ ដោយថាដើម្បីអនុវត្ត អនុសាសន៍នាយករដ្ឋមន្ត្រី ឲ្យបានមួយរយកភាគរយ។
នៅពេលថ្មីៗនេះ លោក ហ៊ុន សែន បានបញ្ជាឲ្យប្រធានក្រុមហ៊ុនទូរសព្ទមួយចំនួនត្រូវដាក់សារជាសំឡេងក្នុងទូរសព្ទដៃ ថា»មីក្រូហិរញ្ញវត្ថុទាំងអស់ជារបស់ឯកជនមិនមែនជារបស់រដ្ឋទេ សូមបងប្អូនប្រជាពលរដ្ឋកុំយល់ច្រឡំ» នូវអ្វីដែលលោក ហ៊ុន សែន អះអាងថាកុំអោយពលរដ្ឋយល់ច្រឡំថាកម្ចីទាំងនោះជាប់ពាក់ព័ន្ធនឹងស្ថាប័នរដ្ឋ ។
លិខិតជូនដំណឹងចុះថ្ងៃទី១០ខែមិនា និយ័តករទូរគមនាគមន៍កម្ពជា លើកឡើងថា មួយរយៈនេះអនុសាសន៍របស់នាយករដ្ឋមន្ត្រី មិនទាន់អនុវត្តបានមួយរយភាគរយកទេ ដោយថាសំឡេងរោទ៍នៅទូរសព្ទ ឬស៊ីមកាតខ្លះ នៅមានចម្រៀងពេញនិយមនៅឡើយ។
និយ័តករទូរគមនាគមន៍កម្ពុជា បានតម្រូវឲ្យក្រុមហ៊ុនទូរសព្ទទាំងអស់ត្រូវធ្វើការកែតម្រូវជាបន្ទាន់ ដោយដាក់សំឡេងរោទ៍តាមទូរសព្ទដៃ ឬស៊ីមកាត ទាំងអស់តាមអនុសាសន៍ និងបិទលេខកូដទាំងឡាយណា ដើម្បីកុំឲ្យអតិថជនរបស់ខ្លួន ដោះឬលុបសំឡេងរោទ៍នោះ ដោយខ្លួនឯងបាន។
ទោះជាយ៉ាងណា អនុសាសន៍ របស់នាយករដ្ឋមន្ត្រីនេះ ត្រូវបានមជ្ឈដ្ឋានមួយចំនួនរិះគន់ថា មិនបានជួយដោះបន្ទុកដល់ពលរដ្ឋដែលកំពុងជាប់បំណុលនោះទេ។
អ្នកតាមដានខ្លះផ្តល់អនុសាសន៍វិញថា ដើម្បីជួយដោះបន្ទុក ពលរដ្ឋដែលកំពុងជាប់បំណុលបាន រដ្ឋាភិបាល គួអន្តរាគមន៍ឲ្យគ្រឹះស្ថានឯកជនទាំងនោះ បញ្ចុះការប្រាក់ ឬរដ្ឋាភិបាល លើកលែងពន្ធក្នុងកម្រិតណាមួយ ដល់គ្រឹះស្ថានមីក្រូហិរញ្ញវត្ថុទាំងនោះ ទើបអាចជួយ ពលរដ្ឋដែលកំពុងជាប់បំណុលបាន។
