រដ្ឋសភាកម្ពុជាបានសម្រេចប្រកាសសុពលភាពតំណាងរាស្ត្រថ្មី ដែលទទួលអាសនៈបន្តពីបក្សប្រឆាំងដែលត្រូវបានតុលាការកំពូលរំលាយចោល។
គណបក្សសង្គ្រោះជាតិ ដែលទទួលបានសំឡេងគាំទ្រប្រហែល ៣លានសំឡេងនៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ហើយថ្នាក់ដឹកនាំ និងសមាជិក ១១៨នាក់របស់បក្សនេះ ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ។
អាសនៈសភាទាំង ៥៥របស់អតីតបក្សប្រឆាំងដ៏ធំមួយនេះ ត្រូវបានគណៈកម្មាធិការជាតិរៀបចំការបោះឆ្នោតសម្រេចបែងចែកកាលពីថ្ងៃទី២២ ខែវិច្ឆិកា ទៅឲ្យគណបក្សចំនួន៥ ដែលក្នុងនោះមាន គណបក្ស ហ៊្វុន ស៊ិនប៉ិច បាន ៤១អាសនៈ គណបក្សសញ្ជាតិកម្ពុជាបាន ២អាសនៈ និងខ្មែរអភិវឌ្ឍន៍សេដ្ឋកិច្ចទទួលបាន ១អាសនៈ។
ក្នុងកិច្ចប្រជុំសភាពេញអង្គនៅព្រឹកថ្ងៃទី២៧ វិច្ឆិកានេះ សមាជិកសភាចំនួន ៤៤រូបមកពីបក្សហ្វ៊ុនស៊ិនប៉ិច គណបក្សសញ្ជាតិកម្ពុជា និងខ្មែរអភិវឌ្ឍន៍សេដ្ឋកិច្ច បានបង្ហាញខ្លួននៅសភា និងទទួលយកអាសនៈបន្ត ខណៈគណបក្សសម្ព័ន្ធដើម្បីប្រជាធិបតេយ្យ គណបក្សខ្មែរឈប់ក្រ ប្រកាសមិនទទួលយកនោះទេ។
បើទោះជាយ៉ាងណា ក្រុមមេដឹកនាំអតីតបក្សប្រឆាំងកាលពីចុងសប្តាហ៍មុន បានចោទ គ.ជ.ប. និងគណបក្សដែលទទួលយកអាសនៈទាំងនេះថា បាន «ប្លន់ឆន្ទៈពលរដ្ឋខ្មែរ» និងបានរំលោភរដ្ឋធម្មនុញ្ញ និងគោលការណ៍ប្រជាធិបតេយ្យ ប៉ុន្តែ បក្សកាន់អំណាចច្រានចោលទៅវិញ។
សហគមន៍អន្តរជាតិ មានសហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានថ្កោលទោសចំពោះរដ្ឋាភិបាលកម្ពុជា ហើយថា ប្រទេសនេះកំពុងឃ្លាតចាកពីគន្លងប្រជាធិបតេយ្យ៕