សភាទាំងពីរថ្នាក់របស់កម្ពុជា បានប្រតិកម្មទៅនឹងព្រឹទ្ធសភាអាមេរិក ដែលដាក់ទណ្ឌកម្មកម្ពុជាជុំវិញបញ្ហានយោបាយ និងសិទ្ធិមនុស្ស បន្ទាប់ពីចំណាត់ការថ្មីៗនេះរបស់រដ្ឋាភិបាលទៅលើបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យមួយចំនួន។
មួយថ្ងៃក្រោយពីគណបក្សសង្គ្រោះជាតិត្រូវបានតុលាការកំពូលសម្រេចរំលាយចោលនោះ ព្រឹទ្ធសភាអាមេរិក បានចេញសេចក្ដីសម្រេចមួយកាលពីថ្ងៃទី១៧ ខែវិច្ឆិកាកន្លងមក ដោយបានថ្កោលទោសរដ្ឋាភិបាលកម្ពុជាថា បានរុកគួននយោបាយ និងសិទ្ធិមនុស្ស។
ក្រុមសមាជិកព្រឹទ្ធសភាអាមេរិក ក៏ទាមទារទៅរដ្ឋាភិបាលលោក ហ៊ុន សែន ឲ្យបញ្ឈប់ការបំភ័យលើបក្សប្រឆាំង និងបើកលំហរប្រជាធិបតេយ្យឡើងវិញ។ ជាវិធានការតបទៅនឹងរដ្ឋាភិបាលកម្ពុជា ព្រឹទ្ធសភាអាមេរិក បានសម្រេចដាក់បញ្ជូលមន្ដ្រីកម្ពុជា ដែលត្រូវបានចោទថា ជាប់ពាក់ព័ន្ធការរំលោភសិទ្ធិមនុស្ស ទៅក្នុងបញ្ជីដែលគេឈប់ទាក់ទង ឬធ្វើពាណិជ្ជកម្មជាមួយ។
ក្នុងសេចក្តីថ្លែងការណ៍រួមចុះថ្ងៃទី២៤ វិច្ឆិកាដែលវីអូឌីទើបទទួលបាន ទាំងព្រឹទ្ធសភា និងរដ្ឋសភាកម្ពុជា បានសម្តែងការសោកស្តាយចំពោះទណ្ឌកម្មដែលសហរដ្ឋអាមេរិកដាក់នេះមកលើកម្ពុជា ហើយហៅការសេចក្ដីសម្រេចនោះថា ជាសេចក្ដីសម្រេចដោយគ្មានការពិចារណាលើទិដ្ឋភាពច្បាប់ និងសង្គមកម្ពុជា។ ស្ថាប័ននីតិប្បញ្ញត្តិទាំងពីរនេះ ថែមទាំងចោទព្រឹទ្ធសភាអាមេរិកថា បានធ្វើឲ្យលទ្ធិប្រជាធិបតេយ្យសេរីពហុបក្ស និងនីតិរដ្ឋនៅកម្ពុជា ដើរថយក្រោយទៅវិញ។
ព្រឹទ្ធសភា និងរដ្ឋសភា បានរៀបរាប់ក្នុងសេចក្តីថ្លែងការណ៍នោះថា៖ «ករណីរបស់ឯកឧត្តម កឹម សុខា មេដឹកនាំគណបក្សសង្គ្រោះជាតិ ដែលត្រូវបានចាប់ខ្លួនពីបទសន្ទិដ្ឋិភាព ដែលជាប់ពាក់ព័ន្ធនឹងអំពើឃុបឃិតជាមួយបរទេស ធ្វើវិទ្ធង្សនាចង់ផ្តួលរំលំរាជរដ្ឋាភិបាលស្របច្បាប់កម្ពុជា គឺមកពីគាត់ត្រូវទទួលបានការចោទប្រកាន់នៃមាត្រា៤៤៣ នៃក្រមព្រហ្មទណ្ឌរបស់កម្ពុជា។ បញ្ហានេះក៏មិនខុសពីករណីរបស់លោក Paul Manafort និងសហការីរបស់គាត់នៅសហរដ្ឋអាមេរិកដែរ»។
ចំពោះការបិទកាសែតឯករាជ្យមួយចំនួននៅកម្ពុជារួមមាន RFA VOA និង Cambodia Daily ជាដើម សភាកម្ពុជាបញ្ជាក់ថា ជាការអនុវត្តច្បាប់របស់កម្ពុជា មិនមែនដោយសារសកម្មភាពសារព័ត៌មានរបស់ពួកគេនោះទេ។
រដ្ឋាភិបាលកម្ពុជា ត្រូវបានសហគមន៍អន្តរជាតិថ្កោលទោស និងព្រមានដាក់ទណ្ឌកម្មជាបន្តបន្ទាប់ ក្រោយពីការរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា និងការបន្តឃុំខ្លួនមេដឹកនាំបក្សប្រឆាំង លោក កឹម សុខា។
សហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានចាត់ទុកថា វិធានការថ្មីៗរបស់រដ្ឋាភិបាលកម្ពុជាទៅបក្សប្រឆាំង អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យមួយចំនួនថា កំពុងដើរឃ្លាតឆ្ងាយពីគន្លងប្រជាធិបតេយ្យសេរីពហុបក្ស ប៉ុន្តែ ប្រទេសចិនកុម្មុយនីស្តបានគាំទ្រចំណាត់ការរបស់កម្ពុជា៕