បន្ទុះដ៏ខ្លាំងក្លាមួយដែលលាន់លឺចម្ងាយរាប់សិបគីឡូម៉ែត្រនោះ បានសម្លាប់មនុស្ស ២នាក់ និងបង្កឲ្យមនុស្សជាង ៣០នាក់ទៀតរងរបួស នៅទីក្រុងកំពង់ផែណីងប៉ូ កាលពីថ្ងៃម្សិលមិញនេះ ខណៈដែលវាក៏បានបំផ្លាញអគារចាស់ៗជាច្រើនផងដែរ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលបានដកស្រង់សម្ដីអាជ្ញាធរចិន និងពលរដ្ឋ ប៉ុន្តែ គ្មាននរណាអាចបញ្ជាក់ពីមូលហេតុនៃការផ្ទុះនោះបានឡើយ។
អាជ្ញាធរទីក្រុងណីងប៉ូ បាននិយាយថា មនុស្ស ២នាក់បានស្លាប់ ហើយ ២នាក់ទៀតរងរបួសធ្ងន់ ខណៈប្រព័ន្ធផ្សព្វផ្សាយរដ្ឋចិន រាយការណ៍ថា មនុស្សជាង ៣០នាក់ ត្រូវបានដឹកយកទៅព្យាបាលនៅក្នុងមន្ទីរពេទ្យនៅទីក្រុងណីងប៉ូ ដែលស្ថិតនៅភាគខាងត្បូងទីក្រុងស៊ាងហៃ ហើយវាក៏ជាកំពង់ផែដ៏ធំមួយរបស់ចិនផងដែរ។
រហូតដល់យប់ថ្ងៃអាទិត្យម្សិលមិញនេះ អាជ្ញាធរក្នុងតំបន់នៅតែមិនទាន់ប្រកាសឲ្យដឹងអំពីមូលហេតុនៃការផ្ទុះនោះនៅឡើយទេ ចាប់តាំងពីសំឡេងផ្ទុះត្រូវបានគេលឺតាំងពីម៉ោង ៩ព្រឹកម៉្លេះ។
រដ្ឋបាលប្រចាំទីក្រុង និងប្រពន្ធផ្សព្វផ្សាយរដ្ឋចិន បានរៀបរាប់ទីតាំងផ្ទុះនោះថា ជារោងចក្រចាស់ត្រូវបានគេបោះបង់ចោល។
ប៉ុន្តែ ពលរដ្ឋនៅទីនោះនិយាយថា ពួកគេជឿថា សំឡេងផ្ទុះនោះ ត្រូវបានគេរៀបចំឡើងដើម្បីបំផ្លាញអគារចាស់ៗ ហើយបើកផ្លូវសម្រាប់ការសាងសង់អគារលំនៅឋានថ្មី៕
