ប្រជាសហគមន៍ដែលចុះល្បាតព្រៃនៅក្នុងខេត្តព្រះវិហារជាមួយដៃគូពាក់ព័ន្ធមួយចំនួនទៀត បានអះអាងថា ចំនួនមន្ត្រីអភិរក្សតិចតួចជាមូលហេតុមួយ ក្នុងចំណោមមូលហេតុផ្សេងទៀតដែលមិនអាចទប់ស្កាត់ទប់ល្មើសកាប់ឈើ។
កាលពីថ្ងៃទី៧ដល់ថ្ងៃទី១០ខែមេសា មានការចុះល្បាតព្រៃឡង់ស្ថិតនៅក្នុងស្រុកជ័យសែន ខេត្តព្រះវិហារ ដែលមានការចូលរួមពី និស្សិត៣១នាក់ អ្នកសម្របសម្រួលកម្មវិធី ៥នាក់ ប្រជាសហគមន៍១៥នាក់ មន្ត្រីបរិស្ថាន៦នាក់ នគរបាលម្នាក់ និងទាហាម្នាក់។
របាយការណ៍របស់ក្រុមល្បាតបានលើកឡើងថា ការកាប់បំផ្លាញព្រៃឈើនៅតែបន្តកើតមានដោយមួយផ្នែកធ្វើសកម្មភាពដោយឈ្មួញ និងប្រជាពលរដ្ឋនៅតំបន់នោះ។ របាយការណ៍បញ្ជាក់ថា ពលរដ្ឋនៅតំបន់នោះខ្លះកាប់ឈើលក់ឲ្យឈ្មួញ និងខ្លះទៀតកាប់ឈើដើម្បីទន្ទ្រានយកដីធ្វើជាកម្មសិទ្ធិ។
ក្រុមចុះល្បាតទាំងនេះ បានប្រជុំផ្លាស់ប្តូរយោបល់គ្នា ដើម្បីស្វែងរកមូលហេតុនៃការបាត់បង់ព្រៃ និងវិធីសាស្ត្រការពារ។
មួលហេតុមួយដែលក្រុមល្បាតនេះរកឃើញគឺដោយសារតែមន្ត្រីការពារព្រៃឈើមានចំនួនតិចពេកក្នុងខេត្តព្រះវិហារគឺមានតែង១៦នាក់។ ចំណែកមូលហេតុផ្សេងៗទៀតមានដូចជា មន្ត្រីពាក់ព័ន្ធសហការគ្នាមិនបានល្អជាដើម។
ដោយ ជាង សំរើន
