ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានប្រាប់អ្នកជំនាញសិទ្ធិមនុស្សអង្គការសហប្រជាជាតិ ឲ្យ«ចុះនរក» ដោយបានព្រមានប្រឆាំងនឹងការលូកដៃចូលកិច្ចការផ្ទៃក្នុងប្រទេសនេះ។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រនៅថ្ងៃនេះ។
រ៉យទ័របានចុះផ្សាយថា តុលាការកំពូលហ្វីលីពីន បានបោះឆ្នោតសម្រេចដកអ្នកស្រី Maria Lourdes Sereno ចេញពីតំណែងប្រធានតុលាការកំពូល ក្រោយពីលោក ឌូទើតេ បានចាត់ទុកអ្នកស្រីជា«សត្រូវ» បន្ទាប់ពីអ្នកស្រីបោះឆ្នោតប្រឆាំងនឹងសំណើដ៏ចម្រូងចម្រាស់របស់រដ្ឋាភិបាល។ ការចិត្តបែបនេះរបស់អ្នកស្រី Maria ត្រូវបានលោក ឌូទើតេ ចាត់ទុកជាការរំលោភលើវិធីដែលអ្នកស្រីត្រូវបានតែងតាំងឲ្យកាន់តំណែងនេះ។
រ៉យទ័រ បានចុះផ្សាយថា លោក Diego Garcia-Sayan អ្នករាយការណ៍ពិសេសអង្គការសហប្រជាជាតិទទួលបន្ទុកឯករាជ្យភាពនៃចៅក្រម និងមេធាវី បាននិយាយកាលពីថ្ងៃសុក្រកន្លងមកថា សេចក្ដីសម្រេចដកហូតអ្នកស្រី Maria នេះ បានបញ្ជូននូវសារដ៏ក្ដៅមួយទៅកាន់ចៅក្រមតុលាការកំពូល និងសមាជិកនៃប្រព័ន្ធតុលាការ។
នៅមុនចេញដំណើរទៅទស្សនកិច្ចនៅកូរ៉េខាងត្បូងកាលពីល្ងាចថ្ងៃម្សិលមិញនេះ លោក ឌូទើតេ ត្រូវបានដកស្រង់សម្ដីដែលបានថ្លែងថា៖ «ប្រាប់គាត់កុំឲ្យលូកលាន់កិច្ចការប្រទេសខ្ញុំ។ លោកអាចទៅនរកបាន»។
មេដឹកនាំហ្វីលីពីនរូបនេះ ត្រូវបានគេដឹងឮថា៖ ជាអ្នកប្រឆាំងនឹងសម្ពាធអន្តរជាតិ និងថ្លែងវាយប្រហារមិនសំចៃសម្ដីទៅលើអ្នករិះគន់រូបលោក៕