ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ បានបង្កឲ្យមានមតិរិះគន់ជាថ្មីទៀត បន្ទាប់ពីលោកបានថើបពលការិនីហ្វីលីពីនម្នាក់នៅឯបរទេស អំឡុងពេលលោកបំពេញទស្សនកិច្ចផ្លូវការនៅកូរ៉េខាងត្បូង។ នេះបើតាមការចុះផ្សាយរបស់សារព័ត៌មានអង់គ្លេស BBC។
លោក ឌូទើតេ កំពុងឡើងថ្លែងទៅកាន់មហាជននៅទីក្រុងសេអ៊ូល នៅពេលលោកហៅស្ត្រីម្នាក់ឡើងលើឆាក និងបានបញ្ចុះបញ្ចូលស្ត្រីនោះឲ្យថើបលោក។
បើតាម BBC ទិដ្ឋភាពនោះទទួលបានការអបអរសាទរពីសំណាក់មហាជន ដែលភាគច្រើនបំផុតជាកម្មករហ្វីលីពីន។
ប៉ុន្តែ ក្រុមសិទ្ធិមនុស្ស Gabriela បានចាត់ទុកទង្វើរបស់ប្រធានាធិបតីហ្វីលីពីនថា បំពានលើស្ត្រី។
ប៉ុន្តែ ស្ត្រីរូបនោះក្រោយមកបាននិយាយថា គ្មានបញ្ហាសម្រាប់ការថើបនោះឡើយ។
នេះមិនមែនជាលើកទីមួយទេដែលលោក ឌូទើតេ បានរងការចោទប្រកាន់ថា ប្រព្រឹត្តមិនសមរម្យទៅលើស្ត្រី៕