សេតវិមាន ឲ្យដឹងកាលពីថ្ងៃទី៥មិថុនា ថា កិច្ចប្រជុំកំពូលលោកប្រធានាធិបតីអាមេរិក ដូណល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន នៅសប្តាហ៍ក្រោយ នឹងប្រព្រឹត្តទៅនៅសណ្ឋាគារ Capella នៅកោះ Sentosa ប្រទេសសិង្ហបុរី។ នេះ បើតាមការចុះផ្សាយរបស់សារព័ត៌មាន Channel NewsAsia។
Channel NewsAsia បានដកស្រង់សម្តីអ្នកនាំពាក្យសេតវិមាន លោកស្រី Sarah Sanders មកចុះផ្សាយថា «យើងសូមថ្លែងអំណរគុណដល់អ្នកគាំទ្រសិង្ហបុរី ដ៏អស្ចារ្យរបស់យើង ចំពោះការទទួលបដិសណ្ឋារកិច្ចរបស់ពួកគេ» ខណៈលោកស្រី បានសរសេរនៅលើបណ្តាញសង្គម Twitter ដោយបានប្រកាសពីគំរោងនៃកិច្ចប្រជុំនៃនាថ្ងៃទី១២មិថុនា។
នៅក្នុងសប្តាហ៍នេះដែរ លោកត្រាំ បានប្រាប់ក្រុមអ្នកសារព័ត៌មានថា ផែនការសម្រាប់អ្វីដែលជាកិច្ចប្រជុំលើកដំបូងរវាងប្រធានាធិបតីអាមេរិកនិងមេដឹកនាំកូរ៉េខាងជើងកំពុង «ដំណើរការយ៉ាងល្អ»។
បើតាម BBC កោះ Sentosa មានទំហំ៥០០ហិកតា និងស្ថិតនៅមិនឆ្ងាយពីតំបន់ដីគោកសិង្ហបុរី ដែលកោះនេះគឺជារមនីយដ្ឋានប្រណីត និងកន្លែងកម្សាន្តផ្ទាល់ខ្លួន។ ប៉ុន្តែ កោះនេះ ក៏មានប្រវត្តិខ្មៅងងឹតនៃអំពីប្លន់តាមសមុទ្រ ការបង្ហូរឈាមនិងសង្គ្រាម៕
