ស្ថានបេសកកម្មអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវប្រកាសថា មន្ត្រីជំនាញUNមានទស្សនៈលម្អៀងលើក្រមសីលធម៌ប្រព័ន្ធផ្សព្វផ្សាយចេញដោយ គ.ជ.ប និង បកស្រាយខុសលើខ្លឹមសារច្បាប់បោះឆ្នោតជ្រើសតាំងតំណាងរាស្ត្រ។
កាលពីថ្ងៃទី១៤ខែមិថុនា អ្នកជំនាញសិទ្ធិមនុស្សនៅអង្គការសហប្រជាជាតិបានសម្តែងការព្រួយបារម្ភចំពោះដំណើរការបោះឆ្នោតនៅកម្ពុជាដោយថា មានការរឹតត្បិតលើសេរីភាពប្រព័ន្ធផ្សព្វផ្សាយ។
ប៉ុន្តែនៅថ្ងៃទី១៥ខែមិថុនាស្ថានបេសកកម្មអចិន្ត្រៃយ៍របស់កម្ពុជា បានចេញលិខិតមួយលើកឡើងថា ក្រមសីលធម៌របស់ប្រព័ន្ធផ្សព្វផ្សាយដែលគ.ជ.ប ដាក់ចេញសម្រាប់ពេលបោះឆ្នោតនោះមិនមែនរឹតត្បិតសេរីប្រព័ន្ធផ្សព្វផ្សាយទេគឺធ្វើឲ្យដំណើរការផ្សព្វផ្សាយមានដំណើរការល្អ។ ក្នុងលិខិតបញ្ជាក់ថា វិធានការនេះក៏បានប្រើក្នុងពេលបោះឆ្នោតក្រុមប្រឹក្សាឃុំសង្គាត់កាលពីឆ្នាំ២០១៨ដែរ ហើយទទួលបានការសរសើរពីសហគមន៍ជាតិនិងអន្តរជាតិ។
ចំពោះវិធានការប្រឆាំងអ្នកអំពាវនាវមិនឲ្យពលរដ្ឋទៅបោះឆ្នោតនោះកម្ពុជា បកស្រាយថា សិទ្ធិបោះឆ្នោតធានាដោយច្បាប់និង ចែងក្នុងរដ្ឋធម្មនុញ្ញ។ លិខិតនោះយោងខ្លឹមសារច្បាប់បោះឆ្នោតជ្រើសតាំងតំណាងរាស្ត្រមាត្រា១៤២ចែងថា អ្នករារាំងដល់ការប្រើសិទ្ធិរបស់ពលរដ្ឋពេលបោះឆ្នោតអាចត្រូវផាកពិន័យ៥លានរៀល ដោយមិនទាន់គិតពីប្តឹងអាជ្ញា។
