ក្រសួងរៀបចំដែនដីន គរូបនីយកម្ម និងសំណង់ បានបដិសេធសំណើប្រជាពលរដ្ឋ២៩២គ្រួសារ ដែលស្នើឲ្យស្ថាប័ននេះ ជួយដោះស្រាយបញ្ហាដីធ្លីរបស់ពួកគេស្ថិតនៅក្នុងស្រុកកណ្តាលស្ទឹង ខេត្តកណ្តាល ជាមួយក្រុមហ៊ុន ហេង អភិវឌ្ឍន៍ ។
ក្នុងសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ចេញផ្សាយកាលពីថ្ងៃច័ន្ទម្សិលមិញឲ្យដឹងថា ក្រសួងសម្រេចមិនធ្វើការពិនិត្យដោះស្រាយបញ្ហានេះទៀតទេ ដោយក្រសួងសំអាងថា ករណីនេះព្រះរាជអាជ្ញារអមសាលាដំបូងខេត្តកណ្ដាល លោក ហួត វុទ្ធី បានចេញដីកាសម្រេចកាលពីថ្ងៃទី២២ ខែមេសា ឆ្នាំ២០០៨រួចហើយ។
ការបដិសេធនេះធ្វើឡើងស្របពេលដែលអគ្គនាយិការក្រុមហ៊ុន ហេង អភិវឌ្ឍន៍ លោកស្រី សៀង ចាន់ហេង កាលពីម្សិលមិញនេះ បានស្នើសុំទៅរដ្ឋមន្រ្តីក្រសួងរៀបចំដែនដី លោក ជា សុផារ៉ា បើកវេទិកាសាធារណៈ ដើម្បីដោះស្រាយបញ្ចប់វិវាទដីធ្លីជាមួយក្រុមពលរដ្ឋ២៩២គ្រួសារ ខណៈក្រុមពលរដ្ឋទាំងនោះបានឡើងមកតវ៉ានៅក្រសួងរៀបចំដែនកាលពីម្សិលមិញនេះដែរ។
ក្នុងដីកាសម្រេចចុះថ្ងៃទី ២២ ខែមេសា ឆ្នាំ២០០៨ របស់ព្រះរាជអាជ្ញារអមសាលាដំបូងខេត្តកណ្ដាល លោក ហួត វុទ្ធី ឲ្យដឹងថា ប្រជាពលរដ្ឋ ២៩២ គ្រួសារដែលបានទាមទារដីនោះ សុទ្ធតែបានកាន់កាប់ជាន់លើដីរបស់ក្រុមហ៊ុន និងបុគ្គលមួយចំនួនដែលមានប័ណ្ណសម្គាល់អចលនវត្ថុរួចហើយ។ បើតាមដីកានោះបន្ថែមថា ប្រជាពលរដ្ឋទាំង២៩២គ្រួសារ បានកាន់កាប់ដីដោយខុសច្បាប់ គ្មានអាជ្ញាធរដែនដីទទួលស្គាល់។
ថ្លែងប្រាប់អ្នកយកព័ត៌មាន VOD នៅព្រឹកថ្ងៃអង្គារនេះ លោក ញ៉េម ញៀប អះអាងជាអ្នកមកតវ៉ាម្នាក់ដែរនោះ មានប្រសាសន៍ថា ពួកគាត់មិនសុខចិត្តទៅនឹងដីកាសម្រេចរបស់ព្រះរាជអាជ្ញាអមសាលាដំបូងខេត្តកណ្ដាលកន្លងមក។
លោក ញ៉េម ញៀប អះអាងជាអ្នកមកតវ៉ា
មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិអាដហុក លោក ស៊ឹង សែនករុណា ជំរុញទៅអាជ្ញាធរនិងស្ថាប័នពាក់ព័ន្ធធ្វើការដោះស្រាយបញ្ហាជម្លោះដីធ្លីជូនប្រជាពលរដ្ឋ ដើម្បីកុំឲ្យប្រជាពលរដ្ឋឡើងមកតវ៉ាម្ដងហើយម្ដងទៀត។
មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិអាដហុក លោក ស៊ឹង សែនករុណា
លោក ញ៉េម ញៀប អះអាងថាដីរបស់ពួកគាត់ទាំង២៩២គ្រួសារមានទំហំ៤៥០ហិកតា ស្ថិតក្នុងឃុំព្រែកហូ ឃុំកណ្តោក ឃុំជើងកែប នៃស្រុកកណ្តាលស្ទឹង និងក្រុងតាខ្មៅ ខេត្តកណ្តាល។ លោកបញ្ជាក់ថាដីនេះមានទំនាស់ជាង១៣ឆ្នាំមកហើយ។ លោកអះអាងថាក្រុមហ៊ុន ហេង អភិវឌ្ឍន៍ របស់អ្នកស្រី សៀង ចាន់ហេង បានយកដីរបស់ពួកគេក្នុងឆ្នាំ២០០៥។
កាលពីថ្ងៃទី ១៣ ខែមិថុនា រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅរដ្ឋបាលខេត្តនានាឲ្យដោះស្រាយវិវាទដីធ្លីក្នុងខេត្តរបស់ខ្លួនឲ្យមានប្រសិទ្ធភាព និងរក្សាភាពអត់ធ្មត់ក្នុងការបំពេញការងារពាក់ព័ន្ធនឹងបញ្ហាទំនាស់ដីធ្លីដើម្បីកុំឲ្យពលរដ្ឋឡើងមកតវ៉ាដល់ភ្នំពេញ៕