ប្រជាពលរដ្ឋ៣១៧គ្រួសារមកពីខេត្តកោះកុង បានធ្វើដំណើរមករាជធានីភ្នំពេញកាលពីថ្ងៃអង្គារម្សិលមិញ ដើម្បីស្វែងរកអន្តរគមន៍ករណីជំលោះដីធ្លី ដែលពួកគេថាជាប់ពាក់ព័ន្ធជាមួយនឹងក្រុមហ៊ុនស្កអំពៅរបស់លោកឧកញ៉ា លី យ៉ុងផាត់។
តំណាងប្រជាពលរដ្ឋដែលមកតវ៉ាលោក នុត សារឿន បានប្រាប់អ្នកសារព័ត៌មានថា ពួកគាត់មកលើកនេះគឺលុះត្រាតែមានដំណោះស្រាយពិតប្រាកដទើបគាត់យល់ព្រមត្រឡប់ទៅស្រុកវិញ។
តំណាងប្រជាពលរដ្ឋដែលមកតវ៉ាលោក នុត សារឿន
ពលរដ្ឋម្នាក់ទៀតដែលមកតវ៉ាដែរនោះ អ្នកស្រី ចេង អូន បានប្រាប់វីអូឌីថា ប្រជាពលរដ្ឋបាត់បង់ជំនឿរទៅលើអាជ្ញាធរដែលបានសន្យាថាដោះស្រាយ តែមិនមានលទ្ធផល ដូច្នេះហើយទើបពួកគេមិនត្រឡប់ទៅវិញដោយគ្មានដំណោះស្រាយ។
ពលរដ្ឋម្នាក់ទៀតដែលមកតវ៉ាដែរនោះ អ្នកស្រី ចេង អូន
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មានប្រសាសន៍លោកកំពុងចូលរួមជាមួយនឹងមន្រ្តីក្រសួងរៀបចំដែនដី ដើម្បីដោះស្រាយបញ្ហាជំលោះដីធ្លីរបស់ប្រជាពលរដ្ឋនេះ។
លោកមានប្រសាសន៍ថា«មកទល់ពេលនេះមានការសម្របសម្រួលពីខាងក្រសួង អាជ្ញាធរ និងរាជធានី»។
កាលពីថ្ងៃទី១៨ ខែឧសភា ឆ្នាំ២០១៨ សាលាខេត្តកោះកុងបានសម្រេចបង្កើតក្រុមការងារខេត្តដើម្បីចុះពិនិត្យនិងសិក្សាករណីទំនាស់ដីធ្លីរបស់ប្រជាពលរដ្ឋនៅក្នុងស្រុកស្រែអំបិល និងស្រុកបូទុមសាគរ។ កាលពីថ្ងៃអង្គារម្សិលមិញប្រជាពលរដ្ឋបានអះអាងប្រាប់អ្នកយកព័ត៌មានថា ពួកគេមិនអាចទទួលយកបាន ពីដំណើរការដោះស្រាយរបស់ក្រុមការងារ ស្រុក និងខេត្តកោះកុង ដែលមិនអនុវត្តទៅតាមគោលការរបស់ពួកគាត់ ដែលបានឯកភាពគ្នាជាមួយក្រសួងដែនដីរួចហើយនោះ។ ពលរដ្ឋអះអាងថាអាជ្ញាធរចង់ឲ្យពួកគេបង្វែរទៅទទួលយកដីនៅកន្លែងផ្សេង ហេតុនេះហើយទើបពួកគាត់កើតទុក្ខមិនសុខចិត្តហើយឡើងមកតវ៉ាជាថ្មីទៀត៕
