គណបក្សប្រជាធិបតេយ្យមូលដ្ឋាន ហៅកាត់ថា GDPបានរិះគន់អាជ្ញាធរមូលដ្ឋានថា មានការរើសអើងមិនឲ្យគណបក្សនេះលើកស្លាកនៅផ្តុំផ្សារពួក ខេត្តសៀមរាបនោះទេ ខណៈបក្សកាន់អំណាចមានសិទ្ធិលើកបានដោយសេរី។
ប្រធានប្រតិបត្តគណបក្សប្រជាធិបតេយ្យមូលដ្ឋាន ប្រចាំខេត្តសៀមរាប លោក ឃុន សាវឿន បាននិយាយរៀបរាប់ក្នុងវីដេអូឃ្លីបបង្ហោះតាមបណ្តាញសង្គមនៅថ្ងៃនេះថា កាលពីពេលថ្មីៗនេះ គណបក្សរបស់លោកបានសុំអាជ្ញាធរមូលដ្ឋានលើកស្លាកគណបក្សនៅម្តុំផ្សារពួក ប៉ុន្តែត្រូវបានអាជ្ញាធរបដិសេធ ដោយថាកុំឲ្យប៉ះពាល់សណ្តាប់ធ្លាប់សាធារណៈ ខណៈបក្សកាន់អំណាចមានសិទ្ធិលើកបានដោយសេរីនៅតំបន់ហាមឃាត់នោះ។
ប្រធានប្រតិបត្តគណបក្សប្រជាធិបតេយ្យមូលដ្ឋាន ប្រចាំខេត្តសៀមរាប លោក ឃុន សាវឿន
អភិបាលស្រុកពួក លោក ម៉ៅ វិសុទ្ធ ទទួលស្គាល់ថា អាជ្ញាធរពិតជាបដិសេធមិនឲ្យបក្សប្រជាធិបតេយ្យមូលដ្ឋានលើកនៅម្តុំផ្សារពួកមែន។ ដោយឡែកករណីអាជ្ញាធរអនុញាតឲ្យគណបក្សប្រជាជនកម្ពុជាលើកស្លាកនៅម្តុំនោះ ដោយសារគណបក្សសុំម្ចាស់ស្លាកឯកជនដាក់។
ទោះជាយ៉ាងណា លោក វិសុទ្ធ បញ្ជាក់ថា គណបក្សប្រជាធិបតេយ្យមូលដ្ឋាន អាចដាក់ពាក្យស្នើសុំលើកស្លាកជាថ្មី នៅក្បែរស្លាកគណបក្សប្រជាជនកម្ពុជាបាន ដោយថាអាជ្ញាធរនឹងជួយសម្របសម្រួលករណីនេះ។
លោកបញ្ជាក់ថា«ខាងគណបក្សមូលដ្ឋានចង់ដាក់[ផ្លាក]អាចទំនាក់ទំនងសាថ្មីវិញ អាចជ្រើសរើសយកទៅដាក់ទៅ អាជ្ញាធរនឹងសម្របសម្រួលជូន»។
ឆ្លើយតបនឹងករណីនេះ អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន មានប្រសាសន៍ថា គណបក្សរបស់លោកនឹងពិភាក្សាជាមួយក្រុមការងារបក្សជុំវិញការដាក់ពាក្យជាថ្មីសុំលើកស្លាកបក្សនោះ។ ប៉ុន្តែលោកបញ្ជាក់ថា ការលើកឡើងរបស់អាជ្ញាធរស្រុកឲ្យបក្សរបស់លោកដាក់ពាក្យជាថ្មីនោះ ជាសញ្ញានៃការធ្វើការមិនច្បាស់លាស់ នឹងធ្វើឲ្យប៉ះពាល់ដល់ពេលវេលារបស់គណបក្សនយោបាយដែលមានបំណងចង់លើកស្លាកតាមគោលដៅ ដែលបក្សបានកំណត់។
លោកមានប្រសាសន៍ថា«ឆ្លុះបញ្ចាំនៃភាពអន់ខ្សោយនៃការធ្វើការរបស់យើង ប្រាប់គេថាលើកមិនបាន ហើយហាមគេមិនឲ្យលើក ហើយក្រោយមកបែជាលើកស្លាកគណបក្សប្រជាជនបានទៅវិញ ហើយឥឡូវមកផ្តល់ព័ត៌មានថា ឲ្យ[GDP]សុំវិញជាដើម មានន័យថា ការធ្វើការរបស់គាត់ វាហាក់ដូចជាអត់តាមនីតិវិធី តាមច្បាប់ត្រឹមត្រូវ ចេះតែថាតាមនឹកឃើញ»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា បើអាជ្ញាធរហាមឃាត់មិនឲ្យបក្សប្រជាធិបតេយ្យមូលដ្ឋានលើកស្លាកនៅម្តុំផ្សារពួក ហើយអនុញាតឲ្យតែបក្សកាន់អំណាចលើកបានតែមួយ គឺជាការរើសអើងផ្នែកនយោបាយ។
លោក សាវាង្ស បានបញ្ជាក់ថា បើអាជ្ញាធរនៅតែបន្តធ្វើបែបនេះទៀត នឹងធ្វើឲ្យប៉ះពាល់ដល់មុខមាត់រដ្ឋាភិបាល។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
ក្នុងពិធីបើកការដ្ឋានពង្រីក និងលើកកម្រិតផ្លូវជាតិលេខ៣ កាលពីថ្ងៃទី០៧ ខែឧសភា ឆ្នាំ២០១៨ លោកនាយករដ្ឋមន្ត្រី ហ៊ុន សែន បានអំពាវនាវឱ្យអាជ្ញាធរមូលដ្ឋានគ្រប់លំដាប់ថ្នាក់ និងស្ថាប័នពាក់ព័ន្ធត្រូវបង្កលក្ខណៈងាយស្រួល ដោះស្រាយបញ្ហាផ្សេងៗដល់គណបក្សនយោបាយទាំងអស់ ជាពិសេស ការលើកស្លាកបក្ស ត្រូវធ្វើឱ្យស្របតាមនីតិវិធី ដោយគ្មានការរើសអើង ដើម្បីឲ្យស្របតាមលទ្ធិប្រជាធិបតេយ្យសេរីពហុបក្ស ស្មើភាពគ្នាឆ្ពោះទៅរកការបោះឆ្នោតនាថ្ងៃទី២៩ ខែកក្កដា ឆ្នាំ២០១៨
ខាងមុខ៕