អយ្យការសាលាដំបូងរាជធានី ភ្នំពេញនៅថ្ងៃទី២៨ ខែមិថុនា ឆ្នាំ២០១៨នេះបានសម្រេចចោទប្រកាន់ស្រី្តខ្មែរបួននាក់ និងបុរសជនជាតិចិនម្នាក់ ដែលជាប់ពាក់ព័ន្ធនឹងការពពោះជំនួស។
កាលពីថ្ងៃទី២១ ខែមិថុនា ឆ្នាំ២០១៨ នគរបាលការិយាល័យប្រឆាំងការជួញដូរមនុស្សនៃស្នងការដ្ឋាននគរបាលរាជធានីភ្នំពេញបានចុះបង្ក្រាបករណីជួញដូរ ស៊ីឈ្នួលពរពោះជំនួស នៅ ខណ្ឌឬស្សីកែវ ដោយឃាត់ខ្លួននារីខ្មែរជាអ្នកពពោះជំនួសចំនួន៣៣នាក់ និងជនសង្ស័យប្រុសស្រីចំនួន៥នាក់ដែលក្នុងនោះមានជនជាតិចិនម្នាក់។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានឲ្យដឹងថា តំណាងអយ្យការបានសម្រេចចោទប្រកាន់មនុស្ស៥នាក់ដែលក្នុងនោះ មានជនជាតិចិនម្នាក់ពីបទ ការជួញដូរមនុស្សដោយឆ្លងដែន ដែលស្ថិតក្នុងមាត្រា ១៦ នៃច្បាប់ស្តីពីការបង្ក្រាបការជួញដូរមនុស្ស និងអំពើធ្វើអាជីវកម្មផ្លូវភេទ និងបទ «អន្តរការីជាមួយស្រ្តីពពោះ» ដែលស្ថិតក្នុងមាត្រា ៣៣២ នៃក្រមព្រហ្មទណ្ឌនៃព្រះរាជាណាចក្រកម្ពុជា។
លោកលី សុផាណាបានបន្ថែមថា តំណាងអយ្យការសម្រេចបើកការស៊ើបសួរនិងបញ្ចូនទៅចៅក្រមស៊ើបសួរ ដើម្បីបន្តនិតិវីធី។
យោងតាមមាត្រា១៦ នៃច្បាប់ស្តីពីការបង្ក្រាបការជួញដូរមនុស្ស និងអំពើធ្វើអាជីវកម្មផ្លូវភេទ មនុស្ស៥នាក់នឹងត្រូវផ្តន្ទាទោសដាក់ពន្ធនាគារពី១៥ (ដប់ប្រាំ) ឆ្នាំ ទៅ២០ (ម្ភៃ) ឆ្នាំ។
ដោយឡែក តាមមាត្រា៣៣២ នៃក្រមព្រហ្មទណ្ឌ ត្រូវផ្តន្ទាទោសដាក់ពន្ធនាគារពី១ (មួយ) ខែ ទៅ៦ (ប្រាំមួយ) ខែ និងពិន័យជាប្រាក់ពី១០០.០០០ (មួយសែន) រៀល ទៅ ១.០០០.០០០ (មួយលាន) រៀល។
គួររំលឹកផងដែរ កាលពីថ្ងៃទី០៣ ខែសីហា ឆ្នាំ២០១៧ សាលាដំបូងរាជធានីភ្នំពេញបានសម្រេចផ្តន្ទាទោសស្រី្តជនជាតិអូស្រ្តាលីម្នាក់ឈ្មោះ Tammy- Alayne Chales និង បក្សពួក២នាក់ទៀតជាជនជាតិខ្មែរ ដាក់ពន្ធនាគារក្នុងម្នាក់ៗ ១ឆ្នាំ ៦ខែ ចោទពីបទ «អន្តរកាលរវាងអ្នកសុំកូន និងស្រ្តីពពោះ និងបទសុំឲ្យផ្តល់ឯកសារទុច្ចរិត» និងពិន័យជាប្រាក់ចំនួន ៤លានរៀលចូលថវិការរដ្ឋ។