ស្នងការខេត្តពោធិ៍សាត់បានបើកវគ្គហ្វឹកហាត់ក្បួនយុទ្ធសាស្ត្រចំនួន ៣ថ្ងៃ ដល់កងកម្លាំងនគរបាលដើម្បីត្រៀមទប់ស្កាត់លើបាតុកម្ម និងកូដកម្ម ដែលនឹងកើតឡើងជាយថាហេតុមុន និង ក្រោយការបោះឆ្នោត។
តាមការចុះផ្សាយរបស់អគ្គស្នងការនគរបាលជាតិបានរឲ្យដឹងថាការហ្វឹកហាត់រយៈពេល ៣ថ្ងៃ ដែលបញ្ចប់កាលពីថ្ងៃទី ២៨ ខែ មិថុនា ដោយវគ្គនេះបានហ្វឹកហាត់ក្បួនយុទ្ធសាស្រ្តបាញ់គ្រាប់ឧស្ម័នបង្ហូរទឹកភ្នែកទៅលើហ្វូងបាតុកម្ម កូដកម្ម ផងដែរ។
តាមការចុះផ្សាយដដែលនៅក្នុងឱកាសបិទវគ្គហ្វឹកហ្វឺននោះ លោក ឆាយ ភន ស្នងការស្តីទីខេត្តពោធិ៍សាត់បានធ្វើការវាយតម្លៃខ្ពស់ និងកោតសរសើរដល់កងកម្លាំងអន្តរាគមន៍ទាំង ៦កង ដែលបានយកចិត្តទុកដាក់ អត់ធ្មត់ និងខិតខំប្រឹងប្រែងរៀនសូត្រ ក្នុងការហ្វឹកហាត់ក្បូនយុទ្ធសាស្រ្តបាញ់គ្រាប់បង្ហូរទឹកភ្នែកនេះ។
លោកបន្តថា៖«កងកម្លាំងអន្តរាគមន៍ត្រូវយកចំណេះដឹងបានពីការហ្វឹកហាត់ និងពង្រឹងសមត្ថភាពរបស់ខ្លួន ដើម្បីត្រៀមលក្ខណៈការពារទប់ស្កាត់ បានរាល់សភាពការណ៍ ដែលកើតមានឡើងជាយថាហេតុ សំដៅក្នុងកិច្ចការពារថែរក្សា សន្តិសុខ សុវត្ថិភាព សណ្តាប់ធ្នាប់សង្គមមុននិងក្រោយការបោះឆ្នោតជ្រើសតាំងតំណាងរាស្ត្រ នីតិការទី៦ នៅថ្ងៃទី២៩ ខែកក្កដា ខាងមុខនេះប្រកបដោយជោគជ័យ និងមានប្រសិទ្ធភាពខ្ពស់ ជូនជាតិមាតុភូមិ។»
កាលពីឆ្នាំមុន រដ្ឋមន្ត្រីក្រសួងសង្គមកិច្ច លោក វង សូត ព្រមានវាយក្បាលអ្នកតវ៉ាដោយគល់ ឬស្សីចំពោះអ្នកតវ៉ាប្រឆាំងការបោះឆ្នោត ខណៈលោក ទៀ បាញ់ ព្រមានវាយបំបាក់ធ្មេញចំពោះអ្នកតវ៉ាករណីដូចគ្នានេះដែរ។