លោកនាយករដ្ឋមន្ត្រី ហ៊ុន សែន បានព្រមានវាយខ្នោះលើអ្នកដែលនិយាយថា ទឹកខ្មៅជ្រលក់ដៃក្នុងថ្ងៃបោះឆ្នោតនឹងធ្វើឲ្យមនុស្សស្លាប់ក្រោយពីជ្រលក់បាន ២៤ម៉ោង ដោយថា ពាក្យចចាមអារាមនេះធ្វើឲ្យឲ្យប៉ះពាល់ដល់សន្តិសុខជាតិ។
ក្នុងពិធីសម្ពោធដាក់ឲ្យប្រើប្រាស់ស្ពានអាកាសមិត្តភាពកម្ពុជា-ចិន ឬហៅថា ស្ពានអាកាសផ្សារដីហុយនៅព្រឹកថ្ងៃនេះ លោក ហ៊ុន សែន បានថ្លែងថា ក្រុមប្រឆាំងមួយចំនួនកំពុងរៀបចំផែនការដើម្បីបំផុសបំផុលពលរដ្ឋថា ទឹកខ្មៅជ្រលក់ដៃក្នុងថ្ងៃបោះឆ្នោតមានពីរប្រភេទ គឺទីមួយទឹកថ្នាំធម្មតា និងមួយប្រភេទទៀតក្រោយពេលជ្រលក់ដៃបាន ២៤ម៉ោងនឹងធ្វើឲ្យមនុស្សស្លាប់។
ជាមួយព័ត៌មានបែបនេះ លោក ហ៊ុន សែន បានព្រមានចាត់វិធានការច្បាប់លើបុគ្គលដែលនិយាយបំភ័យប្រជាពលរដ្ឋមិនឲ្យបោះឆ្នោត និងបញ្ជាទៅសមត្ថកិច្ចឲ្យត្រៀមគុកដាក់ជននោះ។
លោកនាយករដ្ឋមន្ត្រី ហ៊ុន សែន
មុនបោះឆ្នោតពីរថ្ងៃ ពោលគឺនៅថ្ងៃទី២៦ ខែកក្កដា ឆ្នាំ២០១៣ អង្គការឃ្លាំមើលការបោះឆ្នោតខុមហ្វ្រែល បានរកឃើញថា ទឹកថ្នាំជ្រលក់ដៃ ដែលកម្ពុជាទិញពីប្រទេសឥណ្ឌា សម្រាប់កិច្ចការបោះឆ្នោតនោះ អាចលាងជ្រះ ខណៈអង្គការនេះរកឃើញថា អ្នកបោះឆ្នោតជាង ១លាន ២សែននាក់ បាត់សិទ្ធិបោះឆ្នោត ប៉ុន្តែ ត្រូវបានរដ្ឋាភិបាលច្រានចោលការលើកឡើងនេះ។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា បើរដ្ឋាភិបាលនៅតែលាបពណ៌ដាក់គ្នាទៅវិញទៅមក ដោយមិនគិតប្រយោជន៍ជាតិជាធំទេ អាចនឹងធ្វើឲ្យកម្ពុជាវិលទៅរករបបអតីតកាលវិញ។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
ការបោះឆ្នោតជាតិជ្រើសរើសតំណាងរាស្រ្តសភា នឹងប្រព្រឹត្តទៅនាថ្ងៃទី២៩ ខែកក្កដាខាងមុខ ដោយមានការចូលរួមពីបក្សនយោបាយចំនួន ២០ បក្ស។
ប៉ុន្ដែ ប្រទេសលោកសេរីមួយចំនួន បានព្រមានមិនទទួលស្គាល់លទ្ធផលនៃការបោះឆ្នោតខាងមុខនេះទេ បន្ទាប់ពីអតីតគណបក្សប្រឆាំងដ៏ធំនៅកម្ពុជា ត្រូវបានរំលាយចោល ហើយអាសនៈរបស់អតីតបក្សប្រឆាំង ត្រូវបានបែងចែកឲ្យទៅគណបក្សផ្សេង៕