មន្ត្រីនគរបាលចរាចរណ៍ បានឲ្យដឹងថា មនុស្សដល់ទៅ ១ពាន់នាក់ បានស្លាប់ ហើយជិត ២៤០០នាក់ទៀត បានរងរបួស នៅក្នុងគ្រោះថ្នាក់ចរាចរណ៍ទូទាំងប្រទេស នៅក្នុងឆមាសទី១ដើមឆ្នាំនេះ បើទោះបីជាតួលេខគ្រោះថ្នាក់ចរាចរណ៍បានថយចុះក៏ដោយ។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ លោក រុន រ័ត្នវាសនា បានប្រាប់វីអូឌីតាមទូរស័ព្ទនៅថ្ងៃនេះថា គ្រោះថ្នាក់ចរាចរណ៍ បានកើតឡើងចំនួន ១៩៦៣លើកនៅទូទាំងប្រទេស ដោយបានសម្លាប់មនុស្សដល់ទៅ ៩៣០នាក់ និងបណ្ដាលឲ្យមនុស្ស ២៣៩៩នាក់រងរបួស ចាប់ពីខែមករា ដល់ខែមិថុនាកន្លងមកនេះ។
ប៉ុន្តែ មន្ត្រីនគរបាលចរាចរណ៍រូបនេះ បានឲ្យដឹងថា តួលេខគ្រោះថ្នាក់ចរាចរណ៍នៅក្នុងរយៈពេល ៦ខែដើមឆ្នាំនេះ បានថយចុះ ១៤ភាគរយ បើធៀបទៅនឹងតួលេខក្នុងរយៈពេលដូចគ្នាកាលពីឆ្នាំមុន ដោយបានថយចុះពីចំនួន ១៩០៧លើកកាលពីឆមាសទី១ឆ្នាំ២០១៧ មកនៅត្រឹមតែ ១៦៣៣លើកនៅក្នុងឆមាសទី១ឆ្នាំ២០១៨នេះ។
ទោះជាយ៉ាងណា លោកបានឲ្យដឹងបន្ថែមថា ចំនួនអ្នកស្លាប់បានថយចុះតែម្នាក់គត់ ខណៈដែលចំនួនមនុស្សរងរបួស បានថយចុះយ៉ាងច្រើនរហូតដល់ ៦០៧នាក់ ឬបានថយចុះរហូតដល់ទៅជាង ២០ភាគរយ។
មន្ត្រីនគរបាលចរាចរណ៍រូបនេះ បានបន្ទោសទៅលើការបើកបរអត់ពាក់មួកសុវត្ថិភាព បើកបរក្នុងល្បឿនលឿនហួសកំណត់ បើកបរក្រោមឥទ្ធិពលគ្រឿងស្រវឹងថាជាដើមហេតុនៃគ្រោះថ្នាក់ចរាចរណ៍ដ៏ច្រើនបែបនេះ។
របាយការណ៍នគរបាលចរាចរណ៍កាលពីឆ្នាំ២០១៧ បានឲ្យដឹងថា មនុស្សដល់ទៅ ១៧៨០នាក់ ត្រូវបានសម្លាប់ ហើយមនុស្សដល់ទៅ ៥៥៣៩នាក់ បានរងរបួស នៅក្នុងគ្រោះថ្នាក់ចរាចរណ៍ទូទាំងប្រទេសកាលពីឆ្នាំកន្លងមកនេះ៕
