ស្ថាបនិកចលនាមាតាធម្មជាតិ លោក អាឡិច ហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) ស្នើទៅក្រុមប្រឹក្សាវិន័យ នៃឧត្តមក្រុមប្រឹក្សា ដាក់ពិន័យទៅលើចៅក្រមសាលាដំបូងខេត្តកោះកុង ដែលអសកម្មមិនចាត់ការលើសុំណុំរឿងរបស់លោក។
ក្នុងបណ្តឹងមួយចុះថ្ងៃទី២៦ មិថុនាដែលវីអូឌីទើបទទួលបានថ្ងៃនេះ លោក អាឡិច បានប្តឹងទៅក្រុមប្រឹក្សាវិន័យនៃឧត្តមក្រុមប្រឹក្សាឲ្យមានវិធានការទៅលើចៅក្រម ភាព សុភា និងចៅក្រម មិន មករា ដែលបច្ចប្បន្នជាប្រធានសាលាដំបូងខេត្តកោះកុង ដោយចោទ ចៅក្រមទាំងពីរនាក់នោះថា បានទុកចោលសុំណុំរឿងពាក់ព័ន្ធនឹងរូបលោករយៈពេលជិត ៣ឆ្នាំអត់ចាត់ការ ខណៈមេធាវីរបស់លោកបានស្នើឲ្យបើកសវនាការជាច្រើនដងក៏ដោយ។
លោក អាឡិច ចាត់ទុកថា ភាពអសកម្ម និងកប់ទុកសំណុំរឿងដែលចោទប្រកាន់មកលើរូបលោកដោយអត់ចាត់ការនោះបានធ្វើឲ្យប៉ះពាល់ដល់កិត្តិយសរបស់លោក ហើយលោកថា សកម្មភាពនេះផ្ទុយច្បាប់ស្តីពីការរៀបចំអង្គការតុលាការដែលធានាឲ្យមានកិច្ចដំណើរការល្អរបស់អង្គការតុលាការ និងអង្គការអយ្យការដើម្បីផ្តល់ភាពយុត្តិធម៌ដល់ពលរដ្ឋ។
វីអូឌីមិនអាចសុំការឆ្លើយតបក្រុមប្រឹក្សាវិន័យនៃឧត្តមក្រុមប្រឹក្សាបានទេជុំវិញបណ្តឹងរបស់លោ អាឡិច នេះ។
សកម្មជនចលនាមាតាធម្មជាតិ៣នាក់រួមមានលោក សាន់ ម៉ាឡា លោក ទ្រី សុវិគា និងលោក ស៊ីម សំណាង ត្រូវបានចាប់ខ្លួនកាលពីខែសីហា ឆ្នាំ២០១៥ ដោយចោទប្រកាន់ពីបទគំរាមកំហែងធ្វើឲ្យខូចខាតទ្រព្យសម្បត្តិ និងបានដោះលែងឲ្យនៅក្រៅឃុំវិញនៅឆ្នាំ២០១៨នេះ ខណៈលោកអាឡិច ត្រូវតុលាការខេត្តកោះកុងចោទពីបទសមគំនិត និងបានចេញពីប្រទេសកម្ពុជាតាំងពីឆ្នាំ២០១៥។
សកម្មជនបរិស្ថានរូប ធ្លាប់បានស្នើសុំទិដ្ឋាការចូលមកប្រទេសកម្ពុជាដើម្បីប្រឈមមុខនឹងតុលាការ ខណៈចៅក្រមស៊ើបសួរនៃសាលាដំបូងខេត្តកោះកុងបានចេញដីកាចាប់ខ្លួនរូបលោក ប៉ុន្តែក្រសួងការបរទេសកម្ពុជាបានចេញលិខិតមួយដោយជម្រាបទៅ មន្រ្តីអន្តោប្រវេសន៍មិនអនុញ្ញាតឲ្យសកម្មជនអារ៉ែងជនជាតិអេស្ប៉ាញលោក អាឡិច ចូលប្រទេសកម្ពុជាវិញ បើទោះលោកមានទិដ្ឋាការអាឡិច ត្រូនិក(e-Visa)ក៏ដោយ៕