មនុស្សយ៉ាងហោចណាស់ ៥០នាក់ បានស្លាប់ ខណៈដែលមនុស្ស ៥០នាក់ទៀត ត្រូវបានរាយការណ៍ថា កំពុងបាត់ខ្លួននៅឡើយ ដោយសារភ្លៀងដ៏ជោគជាំនៅភាគខាងលិចប្រទេសជប៉ុនកាលពីថ្ងៃម្សិលមិញនេះ។ នេះបើតាមការចុះផ្សាយរបស់សារព័ត៌មាន Japan Today។
សារព័ត៌មានជប៉ុនមួយនេះ បានរាយការណ៍ថា អាជ្ញាធរជប៉ុនបានចេញបញ្ជាឲ្យជម្លៀសមនុស្សដល់ទៅ ៤.៧២លាននាក់ ចេញតំបន់មួយចំនួននៅទីក្រុងឃ្យូតូ បន្ទាប់ពីទីក្រុងបុរាណមួយនេះ ទទួលរងភ្លៀងធ្លាក់ជោគជាំចាប់តាំងពីថ្ងៃព្រហស្បតិ៍កន្លងមកនេះ ដែលបង្កឲ្យបាក់ដី និងទឹកជំនន់លិចផ្ទះសម្បែង និងហូរកួចយករថយន្តរាប់ម៉ឺនគ្រឿង។
ទីភ្នាក់ងារឧតុនិយមជប៉ុន បានចេញសេចក្ដីប្រកាសព្រមានអំពីជំនន់ទឹកភ្លៀង និងការរអិលបាក់ដីដ៏អាក្រក់បំផុតដែលមិនធ្លាប់កើតមាននៅក្នុងរយៈពេល ៥០ឆ្នាំមកនេះ។
ជំនន់ទឹកភ្លៀងដ៏អាក្រក់មួយបានកើតឡើងកាលពីខែសីហា ឆ្នាំ២០១៤កន្លងមក ដោយបានសម្លាប់មនុស្ស ៧៧នាក់ នៅទីក្រុងហ៊ីរ៉ូស៊ីម៉ា នៅពេលភ្លៀងបានធ្លាក់ជោគជាំបង្កឲ្យបាក់ដី និងបំផ្លាញផ្ទះសម្បែង៕