មនុស្សដល់ទៅ ៣៦នាក់ ត្រូវបានសមត្ថកិច្ចចាប់ខ្លួនពាក់ព័ន្ធនឹងបទល្មើសគ្រឿងញៀននៅទូទាំងប្រទេសកាលពីថ្ងៃម្សិលមិញនេះ។ នេះបើតាមរបាយការណ៍នគរបាលជាតិ។
របាយការណ៍បង្ក្រាបគ្រឿងញៀនកាលពីថ្ងៃម្សិលមិញនេះ បានបង្ហាញថា បទល្មើសគ្រឿងញៀន ១៥ករណី ត្រូវបានសមត្ថកិច្ចបង្ក្រាបបានត្រឹមតែមួយថ្ងៃម្សិលមិញនេះ ដោយចាប់ខ្លួនមនុស្ស ៣៦នាក់ ពាក់ព័ន្ធនឹងបទល្មើសគ្រឿងញៀន ក្នុងនោះ ២៦នាក់ពាក់ព័ន្ធនឹងការជួញដូរគ្រឿងញៀន។
របាយការណ៍ដដែលនោះ បង្ហាញផងដែរថា សមត្ថកិច្ចបានរឹបអូសបានមេតំហ្វេតាមីនចំនួន ១២២១,៩៦ក្រាម និង ១៤កញ្ចប់តូច។
បើតាមទិន្នន័យរបស់អាជ្ញាធរជាតិប្រយុទ្ធប្រឆាំងគ្រឿងញៀន គិតត្រឹមដើមរយៈពេល ៦ខែដើមឆ្នាំ២០១៨នេះ អាជ្ញាធរបង្រ្កាបបានបទល្មើសទាក់ទងនឹងគ្រឿងញៀនបានចំនួន ៣៧៥៥ករណី ដោយឃាត់ខ្លួនជនមនុស្សជិត ៦ពាន់នាក់ និងរឹបអូសគ្រឿងញៀនគ្រប់ប្រភេទចំនួនជាង ២០០គីឡូក្រាម។
របាយការណ៍ស្ទង់មតិមួយកាលពីឆ្នាំ២០១៦កន្លងមក រកឃើញថា បញ្ហាគ្រឿងញៀន គឺជាចំណុចខ្សោយមួយរបស់រដ្ឋាភិបាលដែលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន៕