រដ្ឋាភិបាលនៃប្រទេសជប៉ុន បានអះអាងឡើងវិញនូវការគាំទ្ររបស់ខ្លួន ចំពោះគណៈកម្មការទន្លេមេគង្គក្នុងសកម្មភាពបន្តជួយគម្រោងកែលម្អប្រព័ន្ធធារាសាស្ត្រនៅតាមបណ្ដាប្រទេសនៅតាមដងទន្លេមេគង្គក្រោម ដែលរួមមានកម្ពុជា ឡាវ ថៃ និងវៀតណាម។
សេចក្តីប្រកាសព័ត៌មានរបស់គណៈកម្មការទន្លេមេគង្គដែលចេញផ្សាយកាលពីថ្ងៃម្សិលមិញ នៅក្នុងកិច្ចប្រជុំដែលបានប្រព្រឹត្តទៅ នៅទីក្រុងវៀងចន្ទន៍ រវាងនាយកប្រតិបត្តិគណៈកម្មការមួយនេះ និងតំណាងមកពីក្រសួងកសិកម្មរុក្ខាប្រមាញ់ និងនេសាទជប៉ុន នាថ្ងៃទី៥ ខែកក្កដា ឆ្នាំ២០១៨ ជប៉ុននៅតែផ្ដល់ការគាំទ្រគម្រោងនេះ និងក៏ដូចជាសកម្មភាពនានាដែលពាក់ព័ន្ធ។ តាមប្រភពដដែល គម្រោងនេះត្រូវការទឹកប្រាក់១.៤លានដុល្លា។
សេចក្តីប្រកាសព័ត៌មានបន្តទៀតថា ក្នុងរយៈពេល៤ឆ្នាំ ចាប់ពីឆ្នាំ២០១៧ដល់ឆ្នាំ២០២១ ការគាំទ្ររបស់ជប៉ុនផ្តោតលើការកែលម្អប្រព័ន្ធធារាសាស្ត្រដោយធ្វើយ៉ាងណាមិនឲ្យប៉ះពាល់ដល់ត្រីដែលមានជាអាទិ៍ ការជំរុញការតំលើងសម្ភារបរិក្ខាជួយសម្រួលដល់បន្លាស់ទីរបស់ត្រីក្នុងប្រព័ន្ធធារាសាស្រ្ត ការគ្រប់គ្រងការផ្លាស់ប្តូរការប្រើប្រាស់ដីកសិកម្ម កែលម្អមូលដ្ឋានទិន្នន័យប្រព័ន្ធធារាសាស្រ្ត និងគាំទ្រការប្រើប្រាស់ទឹកក្រោមដីប្រកបដោយនិរន្តរភាពនិងការគ្រប់គ្រងសម្រាប់ផលិតកម្មដំណាំនៅទូទាំងអាងទន្លេមេគង្គក្រោម។
រដ្ឋាភិបាលជប៉ុនគឺជាដៃគូអភិវឌ្ឍន៍យូរអង្វែងរបស់គណៈកម្មការទន្លេមេគង្គ។ ចាប់តាំងពីឆ្នាំ ២០០១ រដ្ឋាភិបាលប្រទេសនេះ បានផ្តល់ថវិកាជាង ១៣លានដុល្លារ ដើម្បីគាំទ្រគម្រោងជាច្រើនរួមទាំងការគ្រប់គ្រងទឹកជំនន់និងគ្រោះរាំងស្ងួត ប្រព័ន្ធធារាសាស្ដ្រ ការដឹកជញ្ជូនប្រកបដោយសុវត្ថិភាពការផ្លាស់ប្តូរអាកាសធាតុនិងការគ្រប់គ្រងបរិស្ថានជាដើម។