កងរាជអាវុធហត្ថលើផ្ទៃប្រទេស នឹងចល័តកម្លាំង ៨០០នាក់ ពីរាជធានីភ្នំពេញទៅខេត្តស្វាយរៀង ដើម្បីចូលរួមក្នុងពិធីអបអរសាទរខួបអនុស្សាវរីយ៍លើកទី២៥ ទិវារាជអាវុធហត្ថ។
តាមសេចក្តីប្រកាសព័ត៌មានកងរាជអាហត្ថចេញផ្សាយនៅថ្ងៃទី១០ខែកក្កដា បានឲ្យដឹងថា កម្លាំងកងរាជអាវុធហត្ថចាប់ផ្តើមចល័តចេញពីភ្នំពេញនៅថ្ងៃទី១២ និងចល័តចូលភ្នំពេញវិញនៅថ្ងៃទី១៤ខែកក្កដា។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានអោយដឹងថា ក្នុងការបា្ររព្ធពិធីនៅខេត្តស្វាយរៀងនេះ មានការប្រកួតកីឡាបាល់ទាត់ ការប្រកួតចម្រៀងរបស់កងកម្លាំងជាការអបអរសាទរ និងដើម្បីឆ្លៀតឧកាសសម្ពោធទីបញ្ជាការថ្មីមួយដែលទើបនឹងសាងសង់រួចរាល់ មិនមានការនាំយកគ្រឿងសព្វាវុធតូចធំណាមួយទៅចូលរួមក្នុងកម្មវិធីនេះទេ។
ការចល័តទ័ពនេះ ធ្វើឡើងក្នុងអំឡុងពេលនៃយុទ្ធនាការឃោសនាបោះឆ្នោត ដែលគណបក្សនានារៀបចំហែជាក្បួនដើម្បីផ្សព្វផ្សាយគោលនយោបាយ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន យល់ថា ការចល័តកម្លាំងប្រដាប់វុធនេះ មិនធ្វើឲ្យពលរដ្ឋភ័យខ្លាចនោះទេ។
លោក កន សាវាង្ស មន្ដី្រជាន់ខ្ពស់របស់អង្គការខុមហ្វ្រែល ក៏យល់ឃើញប្រហាក់ប្រហែលលោក សាម អ៊ីនដែរ ដោយថា មិនជះឥទ្ធិពលធ្វើឲ្យពលរដ្ឋភ័យខ្លាចទេ ប៉ុន្តែលោក សាវាង្សថា បើសិនបើមិនមានការចល័តកម្លាំងនេះវាជាការល្អ ក្នុងអំឡុងឃោសនា។
ការឃោសនាបោះឆ្នោត អាណត្តិទី៦នេះ មានរយៈពេល២១ថ្ងៃគឺចាប់ពីថ្ងៃទី៧ដល់ថ្ងៃទី២៧ខែកក្កដា ចំណែកការបោះឆ្នោតប្រព្រឹត្តទៅនៅថ្ងៃទី២៩ខែកក្កដា។
